Пет километри од автопатот „Пријателство“ (Петровец- Катланово), се реконстурираат речиси три години. Градежните работи почнаа во септември 2020та, а се очекува да завршат во јули идната година. Работници и механизација нема повеќе од половина година.
Застојот е затоа што го раскинале договорот со претходната градежна компанија (познавачи велат дека можеле да ја натераат да работи под пенали ама треба ли и новиот директор да склучи некоја зделка? - н.з.). Во тек е оглас за избор на нова фирма.
Додека се чека да заврши реконструкцијата на петте километри кај Катланово, на другиот дел од државата веќе осум години се гради делницата Кичево – Охрид.
Откако решија да го носат во Охрид со кола, на итна обнова на патната мрежа во земјава неодамна повика и нобеловецот Пол Кругман.
Актуелната претседателка Илијана Јотова и поранешниот премиер Андреј Ѓуров освоија најмногу гласови во првиот круг од изборите во Бугарија и ќе се соочат во вториот круг по една недела.
Излезноста на гласачите во првиот круг била едвај над 22%, најниска од кои било избори по соборувањето на комунистичкиот режим. Досега во ниту еден прв круг не паднала под 40%.
Јотова добила 34,7% од гласовите, а Ѓуров 32%. За победа во првиот круг им беа потребни 50% од гласовите, при одѕив од 50%. Во вториот круг нема праг за излезност, а победник е тој што ќе освои повеќе гласови.
Јотова стана претседателка во јануари откако Румен Радев поднесе оставка за да настапи на парламентарните избори.
Функцијата претседател е главно церемонијална, но вклучува овластувања за командување со вооружените сили, ставање вето на закони и именување преодни влади за време на политички кризи.
Луиз Инасио Лула да Силва го освои и четвртиот претседателски мандат во Бразил по драматичен пресврт помеѓу двата круга од изборите. Со тесна разлика од 51,7% наспроти 48,2% од гласовите го победи Флавио Болсонаро – синот на затворениот поранешен претседател Жаир Болсонаро.
Во првиот круг Флавио Болсонаро победи со разлика од 2% и предизборните анкети укажуваа дека ќе ја задржи предноста. Откако Бразил ја отфрли диктатурата, ниту еден кандидат кој губел во првиот изборен круг не станал претседател.
Болсонаро не го призна поразот поради одлуката на Врховниот суд на денот на изборите да го продолжи гласањето за два часа, наводно поради проблеми со јавниот превоз во неколку сојузни држави. Одлуката ја донел судија во Врховниот суд кој порано му бил личен адвокат на Лула.
Левичарот Лула во кампањата ветуваше отпишување долгови, бесплатен јавен превоз за време на викендите и финансиска помош за студенти од сиромашни семејства. Противниците го обвинија дека купува гласови, бидејќи ветените мерки финансиски ќе го осакатат Бразил.
