- „Војаџер 1“ на НАСА денеска стана првото вселенско летало од Земјата што се оддалечило 1 светлосен ден од планетата.
- Сондата лансирана во 1977 година сега е во меѓуѕвездениот простор, на далечина од околу 26 милијарди километри – растојанието што светлината го поминува за точно еден ден.
- Сега се оддалечува со брзина од 61.000 километри на час. Постојано испраќа информации за космички зрачења, бранови на плазма и јачина на магнетното поле.
- За да стигне до таа далечина, човек треба да пешачи 612.000 години. На патнички авион му требаат 3.340 години, а на куршум истрелан од снајперска пушка 821 година.
- Војаџер патува кон ѕвездата Gliese 445, во соѕвездието Мала Мечка, која е оддалечена 17 светлосни години. Со оваа брзина, би требало да стаса за 40.000 години.
- Ѕвездата Проксима Кентаури, која е најблизу до Сонцето, е оддалечена 4,24 светлосни години, односно 1.550 светлосни денови. Андромеда – галаксијата која е најблизу до Млечниот Пат, е далеку 2,5 милиони светлосни години.
- Компанијата за такси превоз со возила без шофер Waymo ги повлече сите роботаксија од автопатите низ САД, откако Калифорнија ги забрани на својата територија како „непосредна опасност за јавната безбедност“.
- Причината се неколку сообраќајни несреќи предизвикани од роботаксијата. На делница од автопатот „101“ навлегле во активна градежна зона, каде што биле имало работници и механизација.
- Пред една недела роботакси на Waymo се обидувало да ги престигне патролните возила што намерно го забавувале сообраќајот на автопатот кај Сан Франциско.
- Waymo управува со такси-возила без возач во 15 градови во САД, но услуги по автопат нудеше само во Сан Франциско, Лос Анџелес, Мајами, Феникс и Остин.
- Компанијата тврди дека нејзините автономни автомобили учествуваат во 95% помалку сообраќајни несреќи со сериозни повреди, во споредба со таксите управувани од луѓе.
- По прекините во авиосообраќајот и банките низ САД поради „технички дефекти“, вчера падна и внатрешната мрежа NSANet на Агенцијата за национална безбедност, преку која агентите за пресретнување комуникации разменуваат најстрого доверливи информации за надгледувани и прислушувани лица.
- НСА синоќа ги затворила канцелариите за повеќето вработени, пропуштајќи само персонал кој е основен за функционирањето, додека се работи на враќање на мрежата.
- Агенцијата категорично тврди дека прекинот не е предизвикан од надворешен кибернетски или хакерски напад, туку дошло до „привремено влошување на перформансите за време на планирано, рутинско одржување“.
- „Иако беа зафатени одредени внатрешни системи, капацитетите клучни за извршување на мисиите остануваат целосно функционални и нашата способност за заштита на националната безбедност продолжува. Инфраструктурата на НСА е дизајнирана со повеќе нивоа со цел да се одржи функционалноста при планирани одржувања или неочекувани настани“, соопшти НСА.
- Секретарот за внатрешна безбедност Марквејн Малин изјави дека неодамнешните прекини во функционирањето на системите во САД се поврзани со вградување на алатки со вештачка интелигенција. „Системите не се дизајнирани за брзината со која денес работи ВИ. Тоа создава преоптоварување и домино-ефект. Кога ќе промените еден елемент во куќата, треба да се сменат и сите останати делови“, изјави Малин.