Вести › Набрзинка

Шпанија ќе ја отвори својата амбасада во Техеран

10 април 2026

Шпанија најави дека повторно ќе ја отвори својата амбасада во Техеран за да ги поддржи напорите за мир по договореното примирје меѓу САД и Иран. Амбасадата привремено беше затворена на 7 март поради безбедносни причини.
„Одлуката ја одразува новата ситуација по договорот за примирје“, изјави министерот за надворешни работи Хозе Мануел Албарес.
Тој изрази и поддршка за Либан, за коj оцени дека е жртва на „брутални и неселективни“ израелски напади, кои се „срам за совеста на човештвото“.
„Видовме како Израел, кршејќи го примирјето и меѓународното право, лансираше стотици ракети врз Либан, во време кога има зрак надеж за целиот регион. Овој напад е вистински срам, треба да биде на совеста на секој што има каква било човечност“, изјави Албарес.

Говорејќи за заканата од Доналд Трамп дека ќе ги „казни“ сојузниците од НАТО кои не ја поддржале војната против Иран, Албарес истакна дека се водат билатерални разговори со Вашингтон за користењето на американските воздухопловни бази Рота и Морон во Шпанија и дека двата објекти работат „сосема нормално“.

извор

Врховен суд: Камчев нема право на 1,5 милиони евра во „Рекет“

30 април 2026

Петмина врховни судии пресекле дека бизнисменот Јордан Камчев нема право да бара милион и пол евра како надомест за штета во предметот „Рекет“ во граѓанска постапка.
Камчев во 2022 ги тужеше Катица Јанева, Бојан Јовановски, Зоран Милевски Кичеец и поранешното СЈО oд кои бараше солидарно да му ги вратат парите што ги дал како рекет.
Подоцна се откажа да го тужи Зоран Милевски Кичеец.
Во образложението на пресудата на Врховниот суд пишува дека Камчев во „Рекет“ не е оштетен. Тој како тужител се впуштил во „морално недопуштено договарање со тужените“ да дава пари за да се спаси од притвор во предметот „Империја“ и затоа нема право да ги бара парите што ги дал.
„Кога двете страни се несовесни, ниту една од нив не може да го поврати назад даденото“, стои во пресудата.

извор

За шест години 604 деца жртви на сексуална злоупотреба

30 април 2026

Анализата на Народниот правобранител за сексуалната злоупотреба на деца во Македонија покажува алармантни податоци и укажува на сериозни системски слабости.
Во периодот 2020–2024 година се евидентирани 508 случаи на сексуална злоупотреба на деца. Само во 2025 година регистрирани се уште 96 деца жртви, со што вкупниот број за шестгодишниот период достигнува 604 жртви.
Најголем дел од случаите се однесуваат на тешки кривични дела, како силување на дете под 15 години (186 случаи) и полов напад и силување (99 случаи).
Од вкупниот број на жртви во периодот 2020–2024 година, 455 се девојчиња (околу 90%), а 53 се момчиња (околу 10%). Во текот на 2025 година, евидентирани се 96 деца жртви на кривични дела против половата слобода, од кои 88 девојчиња и 8 момчиња, при што најчесто регистрирано кривично дело било силување на дете под 15 години, пренесува Дојче Веле.

извор