- Администрацијата на Трамп ја разгледува можноста за напади во Мали, врз бази на Џамаат Нусрат ал-Ислам вал-Муслимин (JNIM) - најголемата терористичка група поврзана со Ал Каеда во Западна Африка.
- САД уште пред неколку месеци побарале дозвола да го користат воздушниот простор на Мали заради извидувачки прелети. Во исто време ги повикуваат владите во Северна и Западна Африка да купуваат американска опрема и услуги за воените напори против терористите.
- Кабинетот е поделен. На опцијата за воена интервенција против JNIM притиска Себастијан Горка, виш директор за борба против тероризмот во Советот за национална безбедност. Други функционери се воздржани, бидејќи рејтингот на Трамп тоне поради војната со Иран.
- Иако Трамп ветуваше дека ќе ги повлече САД од сите „вечни војни“, Мали би била осмата земја во која наредил воени операции во вториот претседателски мандат - по Јемен, Сомалија, Сирија, Иран, Ирак, Нигерија и Венецуела.
- Ситуацијата во Мали е хаотична. По државните удари во 2020 и 2021 година, на власт е воена хунта, која побара помош од руските платеници од „Вагнер“ за да го смири бунтот на џихадистите. JNIM настојува да ја собори владата и да наметне шеријатски закони. Франција во 2022 година го повлече својот воен контингент, кој девет години ги поддржуваше владините сили.
- Бунтовничките хути во Јемен презедоа одговорност за напади со балистички и крстосувачки ракети и беспилотни летала врз два саудиски танкери за нафта што пловеле низ Црвено Море.
- Хутите во понеделникот прогласија блокада за израелски и саудиски бродови низ морскиот теснец Баб ел Мандеб, кој ги спојува Аденскиот Залив и Црвено Море, како поддршка за Иран и одговор на нападите и трговските блокади од Саудиска Арабија.
- Во 2024 година, низ теснецот поминале околу 4,1 милијарда барели сурова нафта и деривати, што е околу 5% од глобалниот извоз. Со оглед на тоа што е затворен и Ормускиот теснец, сега се блокирани 25% од светските резерви на нафта и гас. Бродскиот извоз од Саудиска Арабија е целосно отсечен.
- Јеменските бунтовници ја пореметија глобалната трговија и во 2023 година, кога почнаа да напаѓаат бродови во близина на Баб ел Мандеб по почетокот на израелските напади врз Палестинците во Газа. Ги запреа нападите во 2025 година кога склучија договор со САД, со посредство на Оман.
- Американските власти почнаа повторно да го користат правото на „принуден откуп“ на приватни имоти за да овозможат изградба на огромните центри за податоци од кои се напојува вештачката интелигенција.
- Анкети покажуваат дека дури 70% од Американците не сакаат близу нивните домови да се градат огромни погони, кои трошат струја и вода како цели градови, и затоа одбиваат да им продадат свој имот на технолошките гиганти и енергетските компании кои спроведуваат далноводи и поставуваат трансформатори.
- Владата им е последната можност на инвеститорите да обезбедат локации за изградба, бидејќи може да ги прогласи центрите за критична инфраструктура - слично како и силосите за проектили од времето на Студената војна, и да го искористи своето право на принуден откуп на имот за јавни цели.
- Петтиот амандман на Уставот бара од владата да му обезбеди на сопственикот на земјиштето „праведен надомест“, кој генерално се заснова на фер пазарната вредност на сличен имот во локалната област.
- Во 2024 година, центрите за податоци учествуваа со приближно 10–20% во потрошувачката на електрична енергија во САД, а оттогаш тој процент е значително зголемен. Гигацентарот Хиперион на компанијата Мета во Луизијана, на пример, ќе троши три пати повеќе енергија отколку целиот Њу Орлеанс.
