Вести › Набрзинка

Мицкоски: Украденото мора да се врати

2 февруари 2026

Се одржа конститутивната седница на Националниот совет за финансиски истраги и конфискација на имот.
Премиерот уверува дека ова тело не е формалност, туку јасна и недвосмислена порака дека државата конечно застанува цврсто, системски и бескомпромисно против криминалот и корупцијата.
„Во моментов повеќе од 50 предмети за висока корупција се во постапка, случаи кои со години биле затскриени, одложувани или игнорирани. Очекуваме отворање на нови случаи, темелни истраги и резултати што ќе ја вратат довербата на граѓаните во државата и институциите“, рече Мицкоски.
„Јасно и гласно сакам да порачам: Нема селективна правда. Нема заштитени. Нема недопирливи“.

извор

Иран ги прогласи за терористички војските на сите членки на ЕУ

2 февруари 2026

Исламската Република Иран сега ги смета за „терористички“ војските на сите членки на Европската Унија, како реципрочен одговор откако ЕУ ја прогласи иранската Револуционерна гарда за терористичка група.
„Со обидот да ја нападнат Гардата, која всушност е најголемата пречка за ширење на тероризмот во Европа, Европејците пукаа во себе. Преку слепа послушност кон Американците, донесоа одлука против интересите на сопствениот народ“, изјави претседателот на парламентот, Мохамед Багер Калибаф, кој порано беше командант на Револуционерната гарда.
Како симболичен протест, сите пратеници на седницата биле облечени во униформи на Гардата.
Министерството за надворешни работи објави дека ова е „минималната контрамерка“ на Техеран. Биле разгледани низа мерки и на надлежните тела им биле испратени предлози за одговор на „незаконскиот, неразумен и многу погрешен потег на ЕУ“.
Портпаролот Есмаил Багеи додаде дека се повикани на разговор сите амбасадори на ЕУ во Техеран.

извор

Грција била жртвувана за да се спасат германските и француските банки

2 февруари 2026

Имејл од новообјавените документи од досието Џефри Епстин открива дека меѓународните програми за спасување на Грција на врвот на должничката криза всушност биле наменети за спасување на банките во Франција и во Германија.
„Според економистите што ги истражуваат деталите, околу 90% од плаќањата кон Грција всушност одат кај германските и француските банки кои направиле ризични инвестиции и сакаат да бидат отплатени. Мислам дека овие долгови треба да се сметаат за одвратни и треба радикално да се реструктуираат или да се откажат“, напишал Ноам Чомски во порака до Џефри Е. во јуни 2015 година. Чомски заклучил: „Грците им плаќаат на северните банки за долгови што народот никогаш не ги имал“.
Во текот на годините на финансиска криза (2010–2018) Грција доби повеќе пакети за спасување од „Тројката“ - Европската комисија, Европската централна банка и Меѓународниот монетарен фонд во износ од над 280 милијарди евра.
Анализи од тој период покажаа дека значителен дел од исплатите биле наменети за сервисирање и отплата на кредиторите од приватниот сектор. Преку механизми како размена на обврзници, префрлање на долгот и кредитирање во официјалниот сектор, голем дел од приватната изложеност ефикасно се префрлила на јавните институции низ Еврозоната, при што грчките даночни обврзници на крајот го понесоа товарот.
Поранешниот грчки министер за финансии Јанис Варуфакис тврди дека архитектурата на спасувачкиот план првенствено ги заштитила европските банки од загуби, а на Грција ѝ наметнала строги контракциски политики, што довело до длабока рецесија, зголемена невработеност и пад на животниот стандард.

извор