Вести › Набрзинка

Ирански дронови погодија станбени згради во Бахреин

28 февруари 2026

Ирански дронови погодиле неколку станбени згради во Манама во Бахреин, соопшти тамошното Министерство за внатрешни работи. Нема информации за загинати лица. „Цивилната одбрана продолжува со операции за гаснење пожари и спасување на погодените места“, додаде Министерството.

Израелската армија соопшти дека околу 200 борбени авиони нападнале 500 цели во Иран, вклучувајќи ракетни и одбранбени системи. Тоа било најголемата воздухопловна мисија во историјата на Израел. „Нападите врз одбранбените системи овозможија проширување на воздушната супериорност на ИАФ над иранската воздушна територија и сериозно ги деградираа офанзивните способности на иранскиот режим“, се вели во соопштението.
Но од Бахреин јасно се гледало дека САД и Израел не обезбедиле супериорност, туку како Иран лансира проектили во бранови.

28 февруари 2026

Иранската Револуционерна гарда преку радио-порака ги предупредила сите бродови во регионот на Персискиот Залив дека не им е дозволено да поминат низ Ормускиот теснец. Ова го ијзавиле извори на Ројтерс, а го потврди британската Агенција за поморска трговија, која добила извештаи од повеќе бродови.
Низ теснецот поминува 20% од извозот на нафта и гас од Иран, но и од Ирак, Саудиска Арабија и Обединетите Арапски Емирати.
Техеран со години се заканува дека ќе го блокира сообраќајот како одговор на притисоците и заканите, но тоа никогаш досега не го сторил.
Дури и ограничени прекини во сообраќајот на танкерите низ теснецот би можеле да имаат значителни последици врз глобалната економија и енергетскиот пазар.

28 февруари 2026

Лидерите на Германија, Франција и на Британија во заедничко соопштение ги осудија нападите од Иран врз блискоисточните земји и побараа од Техеран да ги продолжи преговорите за нуклеарната програма.
Фридрих Мерц, Емануел Макрон и Кир Стармер не кажаа ни збор против САД и Израел, кои ја почнаа војната со „превентивните напади“ врз резиденциите на државните функционери во Техеран.
Единствено забележаа дека нивните војски не учествуваат во операцијата „Епски гнев“.
„Најостро ги осудуваме иранските напади врз земјите во регионот. Го повикуваме иранското раководство да бара решение преку преговори. На иранскиот народ мора да му се дозволи да ја одреди својата иднина“, напишаа лидерите на трите земји.