Пред Трамп да му објави војна на Иран, ЦИА изготвила три одделни разузнавачки проценки и во секоја од нив заклучила дека Техеран нема програма за нуклеарно оружје, тврди поранешниот разузнавачки офицер Џон Кирјаку.
Трамп, сепак, повеќе им верувал на информациите што ги добивал од израелскиот премиер Бенјамин Нетанјаху и од Мосад, за кои се потврди дека биле погрешни.
„ЦИА беше прилично доследна во ставот дека војната против Иран е лоша идеја. Анализата покажа дека Иранците се многу поцврсти отколку што веруваа креаторите на политиките“ вели екс-офицерот на ЦИА.
Тим на ЦИА, познат како „црвена ќелија“, чија задача е да размислува надвор од рамките, заклучил дека во случај на војна „Израел е тој што би можел да се распадне и да престане да постои, а не Иран“.
Претседателот Доналд Трамп не бил вмешан во операцијата за трговија со луѓе на Џефри Епстин, заклучи републиканското мнозинство во Комитетот за надзор на Претставничкиот дом во завршниот извештај по 15-месечната истрага како федералната влада го водела случај против Епстин.
„Епстин работеше неказнето, заштитен и овозможен од моќни врски и од правосуден систем кој постојано ги изневеруваше неговите жртви“, изјави претседателот на Надзорниот комитет, Џејмс Комер.
Авторите на извештајот препорачаа Министерството за правда да покрене нови истраги во кругот на Епстин, а од Конгресот побараа да усвои закон „за да се спречи злоупотребата на договорите за доверливост за замолкнување на жртвите од сексуална злоупотреба“.
Лидерот на демократите во Комисијата, Роберт Гарсија, најави дека ќе ја продолжи истрагата по промената на мнозинството во Конгресот.
„Министерството за правда продолжува незаконски да задржува над 2,5 милиони страници документи... Јавниот обвинител Тод Бланш сè уште нема сведочено за својата улога во најголемото владино прикривање во модерната ера“, изјави Гарсија.
Словачкиот премиер Роберт Фицо го обвини германскиот канцелар Фридрих Мерц дека ја уценува Европската Унија со ултимативното барање да вклучи нова помош за Украина во идниот долгорочен буџет на ЕУ.
Мерц инсистира дека поддршката за Украина е „прашање на неделива европска безбедност, па затоа сите мора да се споделат товарот“.
„Она што го прави канцеларот е класичен пример за уцена, и јас тоа го отфрлам. Ние сме суверена земја... Исто како што Мерц зборува за користење на своето право на вето, така можам да кажам и јас. Ние го имаме истото право на вето како и германскиот сојузен канцелар“, рече Фицо по средбата со чешкиот премиер Андреј Бабиш.
Унгарскиот премиер Петер Маѓар, кој вчера се сретна со Мерц во Берлин, се спротивстави на поврзувањето на буџетот со помошта за Украина. „Унгарија, која се соочува со висок јавен дефицит, не може да преземе обврска за ново задолжување на европско ниво“, изјави Маѓар.
Бугарскиот премиер Румен Радев побара изземање на неговата земја од идните кредити за Украина, нагласувајќи дека Софија ќе продолжи да го поддржува Киев на други начини. „Бугарија на ниту еден начин не ги блокира одлуките на ниво на Советот, кои се носат едногласно со цел секој да може да ја поддржи Украина според своите можности“, изјави Радев.
