Во среда, 27.04 од 21 часот во клуб-ресторанот МКЦ, ќе се собереме за да се дружиме и да слушнеме стихови од новата збирка на Јовица Ивановски, „Морето ми е до колена", во издание на Табернакул. Промотор ќе биде Душко Крстевски, а стихови ќе читаат Илина Букбокс, Владимир Јанковски, Николина Андова-Шопова и Петар Андоновски.
За да се загрееме воочи настанот, една човечка песна, за оние кои не заборавиле да бидат луѓе.
УЧАМ ДЕКА НЕ ЗНАМ
Имам само едно небо над мене
и две раце што мавтаат во празно.
И далечините, зарем би копнеел
по нив доколку ми се блиску?
Височините и мојата испружена
рака што менува и прегорена сијалица
Длабочините и сите потонати сништа.
нема цел што не можам да ја промашам.
Го слушавте ли пророкот кој пророкна
дека до мене нема да стигне неговиот глас?
Отворените патишта и мојот тесен кревет -
сè помалку луѓе во мојот отворен свет.
Полната месечина е немилосрдна,
осветлува што треба и што не треба.
Секојдневно, одново учам да бидам човек,
во меѓувреме им се радувам на луѓето
кои не заборавиле дека се луѓе.
Јовица Ивановски
ФБ настан тука
