Наративите за чисти, изолирани и строго дефинирани култури се веројатно најапсурдните историски лаги. Највозбудливите нешта во еволуцијата на човештвото секогаш се случувале на границите каде што различни светови се судираат, тријат и неконтролирано-панкерски се мешаат. Моќта на еклектиката лежи во храброста да се скршат традиционалните калапи и да се создаде хибрид кој го зема најдоброто од две спротивности. Best of компилација. Тој феномен подеднакво добро функционира во музиката, филмот, литературата, архитектурата, но и во кујната.
Храната е можеби најексплозивното платно за вакви радикални фузии. Затоа денес ќе го зграпчиме класичниот Јенки симбол на капитализмот и масовната култура, смеш-бургерот, и брутално ќе го судриме со страсна гастрономија на Медитеранот, попрецизно каталонската кујна.
Резултатот е нов гастрономски превкусен јазик кој ги бутка сите граници, царини, и слични имагинарни линии по атласот. Овој рецепт е врел шамар за пуристите кои сметаат дека бургерот трпи само чедар сирење и индустриски сосови. Денес имплементираме една сложена, повеќеслојна структура која во себе ја носи длабочината на јунешкото месо, но ја облагородува со автентичен каталонски карактер.
Вамос:
Намирници:
Основа и месо:
- Квалитетни меки лепињи или бургер лепчиња (запечени на путер)
- Свежо мелено јунешко месо (поделено на топчиња за „смеш“ техника)
Модифициран каталонски ромеско сос:
- Печени домати и печен лук
- „Печи-гмечи“ црвени пиперки
- Квалитетен купечки кечап и прстофат кафеав шеќер (за финална глазура)
Белиот слој:
- Свежа урда
- Црн сусам и сув лут буковец
Слаткиот контраст:
- Млад кромид (едро сецкан)
- Мед или агаве сируп (за карамелизација)
Свежина и прилог:
- Свежи листови марула
- Компири (исечкани на екстремно тенок, ситен помфрит, алијас пајак-помфрит)
- Масло за пржење, сол и црн бибер
Хибридизација:
Во рерна испечете ги доматите, лукот и црвените пиперки додека не фатат црни дамки. Излупете ги и правец во блендер со многу буковец и црвен пипер. Потоа додадете го во тава заедно со кечапот и кафеавиот шеќер за да ја смирите киселоста и да добиете леплив, богат сос со чадена нота.
Во посебен сад убаво измешајте ја свежата урда со црниот сусам и лутиот буковец. Урдата ќе послужи како кремаст, неутрален ладилник за останатите силни вкусови, додека буковецот суптилно ќе провоцира во позадина.
Во тава со малку маслиново масло пропржете го младиот кромид. Кога ќе почне да омекнува и да ја менува бојата, прелијте го со мед или агаве сируп. Динстајте на тивок оган додека кромидот целосно не се застакли и не стане леплив и сладок.
Исечкајте ги компирите на екстремно тенки, ситни ленти (како кибритчиња). Измијте ги со ладна вода за да се извади скробот, исушете ги добро и испржете ги во врело масло додека не станат тотално крцкави. Посолете ги веднаш штом ќе ги извадите од оган.
Добро загрејте ја тавата. Ставете ги топчињата јунешко месо (претходно зачинето со сол, бибер и лук во прав) и со метален притискач, во овој случај дно од тенџере (или цврста шпатула) брутално згмечете ги директно на врелата површина. Пред да притиснете поставете парче хартија за готвење врз месото.
Печете кратко на силен оган додека рабовите не станат крцкави и чипкасти, па свртете ги од другата страна. Запечете ги внатрешните страни на лепчињата на малку путер во истата тава каде што се печеше месото.
Почнете го редењето на слоевите:
Долно лепче
Дарежлив слој од подготвениот рустичен Ромеско сос
Лист свежа марула
Сочните, крцкави јунешки смеш бургерчиња
Слојот од урда со црн сусам и буковец
Карамелизираниот сладок млад кромид
Горно лепче
Послужете го овој сочен медитеранско-амeрички хибрид на рамна чинија, а покрај него нафрлајте го крцкавиоt помфрит. Јадете со раце, без грижа за нередот што ќе го остави сосот, зашто еклектиката си бара целосно предавање на сетилата.
На здравје!
Кирил Стоименов - фан на Барселона, у книгите на Орвел
