(фото: Epa Images)
Ингерсол Локвуд (1841-1918) бил американски дипломат, писател и адвокат. Пишувал главно книги за деца, но има издадено и еден дистописки роман, под псевдонимот Ирвин Лонгман.
Зошто овие долго заборавени книги одеднаш го привлекоа вниманието на јавноста? Затоа што во нив Локвуд споменува имиња на луѓе поврзани со претседателот Доналд Трамп и го коментира неговото претседателствување во современоста. Уште појасно ќе ви стане кога ќе ги видите насловите на книгите - „Сјајната подземна авантура на Барон Трамп“ и „Последниот претседател“. Барон Трамп случајно е името на синот на реалниот претседател (можеби го добил според книгата?).
Во првиот роман за деца, излезен во 1893, Барон е опишан како богато момче од аристократско семејство кое живее во дворецот Трамп, фиктивна локација која многу потсетува на Кулата Трамп. Има ментор под име Дон.
Во втората книга од 1896, Барон не се појавува, но се опишува политички конфликт кој настанува откако новиот претседател стапува на должност. Политичкиот аутсајдер е од Њујорк, а јавното настроение против него е толку големо што почнуваат протести кои на крај ќе доведат до целосен распад на Американската република.
Еден од пасусите гласи:
„Толпи со различна големина се организираат под водство на анархисти и социјалисти и се закануваат да ги ограбат и уништат куќите на богатите, кои им имаат грешено и ги имаат експлоатирано толку многу години“.
Помеѓу пооткачените толкувања се и оние за кои ова е доказ дека Трамп е патник низ времето, или дека авторот Локвуд е видовит.
Неповрзано со претходното, читајќи за Локвуд внимание ни привлече и насловот на неговата последна книга, пред да почине на возраст од 77 години, кој гласи - „Во променливо расположение“.
