Грчките медиуми деновиве детално известуваа околу сега одбиеното барање на Јоргос Лантимос, дел од новиот филм „Бугоња“ да го снима на Акропол. Во соопштение од Централниот совет за археологија, највисокото тело во државата за сите прашања кои се однесуваат на заштита на древни споменици и археолошки локалитети, објавено вчера, 3.4., се вели дека сцените од филмот „не се конзистентни со вредностите на Акропол“ и се препорачува барање друга локација.
Сцената за којашто станува збор прикажува куп мртви луѓе на Акропол, a помеѓу нив шетаат десетици тренирани (?) мачки.
„Бугоња“ е американски римејк на мрачната научно-фантастичка корејска комедија, „Спасете ја зелената планета“. Основната приказна е тоа што главниот лик киднапира маж (во случајов ќе биде жена), извршен директор на голема компанија, верувајќи дека тој е вонземјанин кој е дојден на нашата планета за да ја уништи. Џеси Племонс ќе го игра конспираторот, кој е истовремено и пчелар.
Зошто пак пчелар? Ова има врска со насловот на филмот, што претставува древен медитаренски ритуал, заснован на верувањето дека пчелите спонтано „се раѓаат“ од мртвите тела на кравите и воловите. Во бизарни описи на ваквите практики кај древните автори (за кои не се знае дали се само метафорични или вистински) во посебно изграден објект за оваа намена се убива вол кој е многу дебел и меснат, и тоа насилно но без да прска крв наоколу. Во шуплините му се става темјан, а потоа се затвораат сите прозорци и врати со густ премаз од глина за да се создаде вакуум. По 11 денови куќата наводно ќе биде полна со пчели, а од волот ќе нема останато ништо.
Ова им се препорачувало на пчеларите како начин да се кренат на нозе по загуба на нивните пчели. Истото можело да се постигне и со мрши од коњи. Ваквата практика кај некои од древните поети (како кај Овидиј) се спомнува како докажан и очигледен факт, а ова продолжило и кај многу подоцнежни автори, дури до 18 век.
