Иако денес раменот и неговите нудли се сметаат за симбол на јапонската кујна, неговите корени водат до Кина. По отворањето на Јапонија кон светот од средината на 19 век година, започнала културна и трговска размена, а со неа пристигнале и кинеските мигранти кои ги донеле своите гастрономски вештини. Нудлите направени од пченица наскоро нашле свое место на јапонските трпези. Во 1926 година, кинески готвач по име Ванг Вен-чаи, во ресторан во Сапоро, Хокаидо, направил прв обид за да создаде рамен кој ќе им се допадне и на јапонските и на кинеските студенти кои студирале тука - основа за она што денес се смета за класичен ресторантски рамен.
По војната, Јапонија се соочила со сериозен недостиг од храна, а црниот пазар процветал со продавачи кои нуделе рамен. Момофуку Андо забележал долги редици пред овие импровизирани тезги и се запрашал како би можело ова јадење да биде достапно и дома, без потреба од готвење или чекање. Одговорот го пронашол, сосема случајно, додека ја гледал својата сопруга како приготвува темпура - јадење што се состои од парчиња зеленчук или морски плодови кои се натопуваат во лесна смеса од брашно и вода, па се пржат во длабоко масло до златна и крцкава кора. Забележал дека врелото масло ја извлекува влагата од тестото, процес кој може да се примени и за нудлите, за тие да дехидрираат и да се зачуваат подолго време.
По една година експериментирање во својот двор, Андо го усовршил процесот на длабоко пржење за сушење на нудлите и така ги создал првите инстант нудли. Кога конечно се појавиле на полиците, тие се продавале како луксузен производ, биле шест пати поскапи од свежите нудли и првично биле дочекани со скепса. Но со текот на времето, цената паднала, популарноста пораснала, и во 1971 година Андо го претставил и првиот производ во чаша – „Кап нудлс“, кој стана глобален феномен.
Оттогаш, инстант раменот се има развиено во безброј вкусови, кои можат да се најдат и во нашите продавници. Но оригиналниот вкус од 1958 - од кокошка - сè уште се произведува и е достапен во продавниците, потсетник на едноставниот, но генијален одговор на една криза.
