Незаборавниот херој на миланското дерби

Масимо Морати немаше доверба во ниту еден тренер. Го смени и осмиот за шест години. Роналдо со неверување го гледаше десеттиот пораз на Интер во првенството. Бразилецот за време на миланското дерби седеше покрај претседателот на трибините и се опоравуваше од повредата на коленото.

 

Во првите 20 минути од мечот Милан - Интер два гола даде 23-годишниот новајлија кој ја наследи деветката на Жорж Веа. Следуваа головите на Федерико Џунти, Шевченко и Сержињо и на Морати веќе му беше многу неудобно во ложата. После 6:0 за Милан, Бобо Виери се расплакал на паркингот под стадионот пред новинарите.

 

Тренерот на Интер, Марко Тардели таа мајска вечер ја заврши кариерата. Младиот напаѓач на Милан за 20 минути му ја спакува кариерата на Тардели, кој му беше селектор во У-21 селекцијата.

 

Година пред ова дерби, Тардели од Серија Б го викна младиот Командини на Евро У-21 во Словачка. Во првото коло Италија играше против Англија со капитенот Лампард и Карагер. Тогашниот напаѓач на Виченца, Командини во нападот играше заедно со талентите на Интер Никола Вентола и Андреа Пирло (играа уште и Ѕанети и Абијати). Аѕурите завршија први во групата, потоа стигнаа до финалето каде Командини изнуди пенал, а Пирло даде гол за титула европски првак. 

Веднаш после тоа ЕП, Командини за 20 милијарди лири замина во Милан. Веа потпиша со Сити, Бироф веќе беше во позни години, така што Командини стана новиот партнер на Шевченко, прв фантастичен тандем од времето на Даниеле Масаро и Марко Симеоне.

 

Набрзо Џани стана ѕвезда во Милано. Познатиот женски магазин Дона Модерна го покани него во првиот календар со фудбалери каде се сликаа уште и Симоне Инѕаги, Зидан, Буфон, Верон, Сидорф, Дел Пјеро... Џани беше сликан за месец ноември, а Шева за февруари. Го застануваа на секој чекор за да се сликаат со него и да побараат автограм.

 

Првиот гол за Милан, Командини го даде во квалификациите за ЛШ против Динамо Загреб, но повредата го оддалечи од теренот до јануари следната година. На Сан Сиро наместо Ѕакерони дојде Чезаре Малдини, творец на најголемата победа на Милан од 6:0 кога Командини стана првиот играч после Паоло Роси кој на дебито за Милан дал два гола. За жал, први и последни голови за Милан во Серија А. 

20-годишниот шпиц ѝ помогнал на Чезена да се врати во Серија А со шест голови. Го заинтересирал Серџо Гаспарин, кој бил претставник на компанијата спонзор АЕК, Славија Прага, Базел и Виченца. Во 1998. година, Виченца стигна до полуфиналето на Купот со убиствениот тандем Командини - Пасквале Луиѕо, предводени од Едоардо Реја. Џани остана запаметен и по тоа што беше најдобар стрелец на Италија на ОИ во Сиднеј.

 

Во Милан имаше проблеми со 'рбетот и често беше надвор од првите 18. И покрај убедливиот триумф против Интер, Милан на крајот заврши под ривалот, така што летото Галијани и Браида отидоа во лов и се вратија со Пипо Инзаги во Миланело.

Дојдоа Руи Коста, Пирло и Хави Морено (трет стрелец во Примера во сезоната 00/01). Бироф тоа лето замина во Монте Карло, така што Командини и натаму можеше да смета на статусот трет напаѓач. Во еден момент се случил пресврт во неговата кариера.

Генералниот директор на Аталанта, Бепе Марота во телефонски разговор со претседателот на Бергамашите Иван Ругани се договорил за Џани Командини да платат 30 милијарди лири, 15 милиони евра со што го направија најскапиот трансфер во клупската историја. Во летото 2001-ва Руџери ја создаде неверојатната Аталанта. Екипата која се врати во Серија А го намами Бепе Марота од Венеција кој со себе го донесе Маурицио Ганц, го позајми Венола од Интер и го врати од позајмица голманот Иван Пелицоли.

Аталанта до февруари беше четврта на табелата и имаше пласман во ЛШ. Во составот беа близнаците Ѕенони, Масимо Донати и чудесниот Кристијано Дони, како и Лука Саудати детето на Милан.

Командини и натаму имаше проблеми со грбот, следуваше операција после што тој сфатил дека маката со долниот дел на 'рбетот е неподнослива и ги прекина сите тренинзи. Аталанта го праќаше на позајмица во второлигашите Тернана и Џенова, период после кој Командини одлучи што е најдобро за него.

Џани со спуштена глава се вратил во Чезена, со другарите го обновил градскиот театар каде почнал да работи како ди-џеј (пуштал сетови од AC/DC, Ред Хот Чили Пеперс и Квин). Отворил ресторан на плажата Чезенатико и играл аматерски во екипата основана од неговиот татко Паоло во 1983-та.

„Фудбалскиот свет е убав и возбудлив, но во исто време е тежок и не е човечки. Уморен сум од сето ова, не се чувствувам пријатно. Благодарение на фудбалот го прошетав целиот свет, живеев во хотели со 5 ѕвеѕди, но секогаш во затворен простор, под надзор, во контролирано опкружување. Сакав да излезам од оваа област. Да разговарам со луѓе кои не ги интересира фудбалот и кои ќе ме сакаат или мразат како човек а не како играч", изјави Командини во интервју за Република ТВ и Кориере дела Сера.

Го викале во ОАЕ каде можел да заработи многу пари, но тој одбил. На 28 години ја заврши кариерата, стави ранец на грб и почна една нова авантура:

„Купив авионска карта и импровизирав. Спиев по хостели, бунгалови, апартмани и плажи. За шест месеци ги пропатував Бразил, сурфаф во Порторико, Панама, Мексико, Австралија, Фиџи, Нов Зеланд. Моето ново хоби е сурфингот каде за разлика од фудбалот нема цврсти и строги правила. Сурфингот е слобода", раскажуваше тогаш Командини.

Кога новинар на Milan News пред неколку години го прашал дали знае дека многу луѓе мислат дека забегал што на 28 години ја прекинал фантастичната кариера во 2006-та, Командини изјавил:

„Речиси сите зборуваат така. Не ме поддржаа многу луѓе. Народот мисли дека животот почнува и завршува со фудбал. Сепак фудбалот не беше врвот на мојот живот, ми беше само голем терет. Се откажав од многу пари во Емиратите, но ја добив слободата која е бесценета. Сакам едноставен живот. Немам Ферари, голема вила или јахта, не затоа што не можам да ги приуштам, туку затоа што штедам за други работи", констатираше незаборавниот херој на миланското дерби.

Командини ги доживеа своите пет минути слава кога го матираше Себастијан Фреј на два пати. Потоа си докажа себеси дека за да биде среќен нема потреба од споредби со Паоло Роси, фото сесии по женски магазини и трансфери со девет нули.