Потребни состојки:
- 120гр ореви
- 60гр шеќер
- 120гр путер
- 180гр брашно
- 250гр крем сирење
- 120гр шеќер во прав
- 500мл слатка павлака
- 1 чоколаден пудинг
- 1 ванила пудинг
- темно чоколадо
Многу ми е интереен фактот што мајка ми ми се јавува стално кога не ми е тука паметот за разговор, а што е најинтересно, повеќето од разговорите секогаш ни се состојат за храна. Пред три минути ми се јави и муабетот одеше вака:
Мајка ми: Што правиш?
Јас: Еве маки, пишувам рецепт!
М: Мхм, добро. Јас да ти кажам што све имам направено за во недела (роденден на сестра ми).
И набројува, набројува..а мене паметот на рецептов.
Ј: Добро маки, супер, ќе пробаме. Ај се гледаме.
Пред неколку дена ми се јавува додека сум на работа во најголема гужва:
М: Каааај си бе ќерко? (со радост во гласот)
Ј: Мајко, многу работа имам, може да се чуеме покасно? (со телефонот на рамо и мешам три тави паралелно)
М: Ааа добро тогаш, него, најдов еден рецепт ама не знаеш колку е добар, мора да го направиш. Значи оди вака, 300гр брашно.....
Ј: Мамо, работам! Ќе ти се јавам!
М: Добро, добро, само посети ја оваа веб страна (и ми кажува некое име)
Неколку дена подоцна пробав да ја најдам страната и така барајќи налетувам на овој рецепт кој ме привлече по своето име "Sex in a pot". Еј, си велам, морам да го направам!
Го направив, го пробав и мислам дека сега ви е на вас редот за секс во тава :)
Чекори за подготовка:
- Вклучете ја рерната на 180 степени.
- Земете длабока тава или оној стаклен огноотпорен сад и премачкајте со путер. Тавата да не биде многу широка.
- Во еден сад за матење ставете ги путерот (исецкан на коцки), оревите (крупно исецкани), брашното и шеќерот.
- Почнете да матите со миксер. Бидејќи путерот е тврд, можете или да го оставите малце на собна температура или да бидете упорни како мене и да направите лом во кујна. Ќе добиете една смеса по структура како песок. Ставете ја во тавата.
- Истапкајте ја со раце рамномерно насекаде. Ставете ја да се пече 20 минути, извадете ја и оставете да се олади.
- Додека се лади тестото, во друг сад за матење направете шлаг од павлаката и оставете го на страна. Во уште еден сад ставете го крем сирот и шеќерот во прав. Матете додека не се соединат и на крај додадете два големи зафати со супена лажица од шлагот. Матете уште малце.
- Овој крем ќе го ставите на изладеното тесто.
- Ставете го во фрижидер додека го правите пудингот. За да не се мачите како мене, со обичен пудинг што мора да го вариш и да чекаш да се олади, земете си од оние пудинзи што одма се прават со ладно млеко. Еден ванила, еден чоколаден.
- Извадете ја тавата од фрижидер и ставете го чоколадниот пудинг.
- Потоа ставете го пудингот од ванила.
- И на крај ставете го остатокот од шлагот што го измативте, а врз него ќе изрендате темно чоколадо.
- Оставете го во фрижидер неколку саати. Знам, и мене најмногу ме нервира овој дел на чекање! Откако убаво ќе се олади исечете го на еднакви коцки и послужете. Со ова, официјално сте направиле секс во тава! :))
