Малку работи фатија, ама тие што ги фатија, брилијантно ги утнаа. Неработна недела е  уште една демагошка парола околу која лесно се сојузуваат политичари од спротивставени табори. Добро, ќе бидат ли и рампите на патарините дигнати во недела, зашто и тие работници се луѓе? Плус, така полесно ќе биде да се оставаат пари за шопинг во - Солун.

„Верувам дека историјата ќе го смета затворањето на општествата поради коронавирусот за монументална грешка на глобално ниво која не смее да се повтори,“ изјави Марк Вулхаус, професор на Универзитетот во Единбург и врвен медицински советник на британската влада. Зошто тогаш нè затвораа по дома? Затоа што не им текнувало ништо попаметно.

Ѓоковиќ проба корона-драмата милеровски да ја напушти. Да обзнани дека животот мора да продолжи понатаму а ова што го имавме во претходните месеци не е живот и никогаш не смееме да прифатиме да го дефинираме како живот. Праведниците и душегрижниците ќе му се лутат како што ни се лутат и нам, малите и анонимни граѓани кои би сакале, малку од малку, да ги живуцкаме нашите животи, да се дружиме - дури и да се допираме и љубиме, јеботе! - да седиме во кафани, да одиме во театар (нема да ни дадат, не се секирајте) и генерално, да се однесуваме некако нестерилно.

Ако вонредната состојба стане нешто што, како одговорни граѓани, не само го трпиме туку нешто што го бараме и повикуваме, одново ќе се потврди колку кај многумина е тенка и лесно пробојна корицата на „демократски уверувања“ и колку лесно некое драстично пореметување на секојдневната животна рутина, во нив ги буди оние кои слободата веднаш би ја трампале за сигурност. При што во таа трговија ќе се добие гарантирана неслобода и тенка и многу залажувачка сигурност.