Со головите на Фримпонг во 7-ма, Адли во 20-та, Вирц во 35-та и 60-та минута, тимот на Чаби Алонсо рутински ја совлада Фортуна Дизелдорф и ќе игра во големото финале на Куп на Германија против Кајзерслаутерн.
„Аспиринџиите“ со оваа победа практично се доближија уште повеќе до двојната круна во Германија затоа што во првенството имаат огромна предност од +13 бода над Баерн Минхен.
Притоа во четвртфинале на Лига Европа Баер Леверкузен ќе игра против англискиот премиерлигаш Вест Хем.
ЛЕВЕРКУЗЕН Е НЕПОРАЗЕН НА ЧЕТИРИЕСЕТ МЕЧА ПО РЕД
Со триумфот на Фортуна Дизелдорф во полуфиналето на Купот, Баер Леверкузен нема пораз во сите натпреварувања сезонава на дури 40 меча. Ова го става на високото 9-то место на вечната листа екипи со најдолга непобедлива серија.
Бундеслигашот се израмни со сериите на Фиорентина во сезоната 1995/1956, Нотингем Форест од 1978-ма, Реал Мадрид 2016/2017, Црвена Звезда 2020/2021. Пред нив се велшки Њу Сеинтс со 41 меч без пораз сезонава 2023/2024, Ајакс од 1995/1996 со 42 натпревари без пораз, Милан од 1991/1992 со серија од 42 средби без пораз, Јувентус со 43 меча незагубени во 2011/2012, Ренџерс со 44 натпревари 1992/1993, Ријека со 45 натпревари во 2016/2017, Динамо Загреб исто со 45 натпревари без пораз во 2014/2015, и лидерот Бенфика која од 1963 до 1965 не осетила пораз на дури 48 меча по ред.
Во далечното минато се паметат серии на Селтик од 1915/1917 кога имал 62 натпревари без пораз и белгиски Унион Сен Жилоа со 60 натпревари во 1993/1935.
До крајот од сезоната Леверкузен игра против:
- Унион Берлин (на гости, Бундеслига)
- Вест Хем (дома, Лига Европа)
- Вердер Бремен (дома, Бундеслига)
- Вест Хем (гости, Лига Европа)
- Дортмунд (гости, Бундеслига)
- Штутгарт (дома, Бундеслига)
- Лига Европа евентуално полуфинале (на гости против Милан или Рома)
- Франкфурт (гости, Бундеслига)
- Лига Европа евентуално полуфинале (дома против Милан или Рома)
- Бохум (гости, Бундеслига)
- Аугзбург (дома, Бундеслига)
- Лига Европа (евентуално финале во Даблин против Бенфика/Марсеј/Аталанта/Ливерпул
- Куп на Германија (финале против Кајзерслаутерн во Берлин)
