Во сенка на илјадниците извештаи, фотографии, видеа и статии за финалето на Лига на шампиони, во Полска се игра Светско првенство за играчи до 20 години. Само што завршува групна фаза а веќе има многу занимливости.
Во последното коло од групата Ц играа Норвешка и Хондурас. Двете репрезентации не освоија ниту бод во првите свои дуели против Уругвај и Нов Зеланд, но една од нив се уште можеше да се надева дека на крај ќе биде најдобра третопласирана селекција (4 од 6 најдобри трети одат во плејофот).
И замислете, Норвешка победи со 12:0! Што е уште полудо: напаѓачот Ерлинг Холанд постигнал 9 гола на овој меч.
Го памтите сигурно чувството кога сте играле во маало а голови давал самое ден човек? Епа тоа им се случило на младите репрезентативци на Хондурас У-20. Холанд првиот гол го дал во 7’ минута а до крајот на првиот дел постигнал четири погодоци. Давал голови од близина, од крило, избегнувал офсајд замки и изнудувал пенал кој сам го реализирал.
Како успеале луѓето од ФИФА да сместат 12 гола во 2 минутно видео, алал да им е:
На играчите на Хондурс не им било нималку пријатно, а двајца фудбалери добиле црвени картони и предвреме го напуштиле теренот.
Норвешка и Ерлинг срушиле 2 рекорди:
- Ова е најголема победа во историјата на Светското првенство за играчи до 20 години,
- Холанд го сруши рекордот на Бразилецот Адаилтон кој во 1997-ма година дал 6 гола против Јужна Кореја на СП У20.
Можно е овие голови да и помогнат на Норвешка да се пласира во нокаут фазата. Во три групи веќе се одиграа сите натпревари, а во две од нив репрезентациите кои се на трето место имаат повеќе бодови од Норвешка.
За Норвежаните да одат понатаму треба да се исполнат неколку услови: Панама да не освои бодови со Саудиска Арабија, Кореа или Португалија да изгубат во дуелите со Аргентина и Јужна Африка.
Сосема извесно Холанд ќе стане најдобар стрелец на Мундијалот, без разлика што на првите два меча не дал гол. Зад него со по 3 постигнати гола се Амаду Сања од Сенегал и Хуан Ернандез од Еквадор.
*****
Ерлинг Холанд е роден во Англија. Татко му Алф Инге Холанд во тоа време играл за Лидс Јунајтед (а уште и за Манчестер Сити и Нотингем Форест).
Со фудбал малиот Ерлинг почнал да се занимава во Молде, а минатата сезона (2018-та), Оле Гунар Солскјер го прекомандувал во првиот тим. Ерлинг имал одлична статистика: 25 меча и 12 гола во првенството на Норвешка (трет стрелец во лигата) и уште 4 гола на 5 меча за Молде во Лига Европа.
Изминатава зима Холанд премина во Ред Бул Салцбург за 5 милиони евра (во Австрија одамна го следеле фудбалерот уште пред 2018). Во австриската лига тој не е толку сјаен како во Норвешка: има 1 гол на само 2 меча, но после вакво Светско првенство сигурно ќе добие повеќе шанса.
