Во едно интервју, покрај тоа што успеа да ги навреди, главниот маркетинг директор на Викторијас Сикрет, Едвард Разек несакајќи даде многу едноставно објаснување околу долгогодишното досаѓање „ЗОШТО НЕМАТЕ ДЕБЕЛИ” и „ЗОШТО НЕМАТЕ ТРАНСРОДОВИ”.
Кажа:
„Сум размислувал да земам трансродови манекенки во минатото, но заклучив дека на компанијата не ѝ е таргет целиот свет.”
Ете, толку било едноставно.
Си отвараш фирма и си викаш „мене таргет ќе ми бидат рудари.” И кога ќе дојдат пожарникари да ти кукаат „е зашо да немаш пожарникари” некако, стварно не знаеш како да реагираш, па си ќутиш.
Па, ќе пробаш да објасниш.
И пак ќе ти се качат на глава.
Главно, проблемот е што рекол дека ревиите на ВС се „фантазија”, и со тоа повредил чувствата на сите што не спаѓаат под фантазија за овој седумдесетгодишен човек.
Во постот пишува:
„Мојот коментар во однос на инклузија на трансродови манекенки во ревијата на ВС звучи бесчувствително. Се извинувам. Да бидам јасен, секако дека би најмиле трансродова манекенка. Ни доаѓале на кастинг… И како и многу други, не поминале.”
И продолжува:
„Воопшто не се работи за пол. Го почитувам и со восхит го гледам нивниот пат до прифаќање на она што се.”
Од јавни извинувања до сега научивме дека се џабе и дека по социјални мрежи секако го јадеш.
Па така, голем дел од транс-публиката избра да не го прифати извинувањето, додека исто така голем дел од plus-size публиката се најде повикана да плаче и по нивното извинување.
Еден твит имаше дури и од типот „што беше тоа Викторијас Сикрет”, како на Офф.нет што му прават!
Најјако.
Во уште една, веќе вирална изјава, Разек вели:
„Ако прашувате дали сме помислиле да земеме трансродова или крупна манекенка, сме помислиле. Ние ги измисливме plus-size ревиите во нашата сестринска дивизија, Лејн Брајант. Таму уште се продава plus-size долна облека, но продава одреден избор, како и секој бутик во светот што продава одреден избор на облека. Како и ние. Продаваме на тие што ни се пазар, а не ни е целиот свет пазар.”
И како заклучок, вели: „Пробавме да направиме специјално шоу со plus-size манекенки во 2000-та. Никого не го интересираше. Сè уште не ги интересира.”
Некои објаснувања се толку едноставни.
