- Сенатот на САД со 53 наспроти 47 гласа ја отфрли резолуцијата која потенцијално би ја запрела војната што Трамп ја почна во Иран. „Резолуцијата за воена моќ“ предвидуваше претседателот да бара одобрение од Конгресот за секој понатамошен напад.
- Се гласаше по партиски линии. Единствено републиканскиот сенатор Ранд Пол гласаше за ограничување на Трамп, а демократот Џон Фетерман беше против.
- „Денес секој сенатор поединечно ќе избере страна. Дали сте со американскиот народ кој е исцрпен од вечните војни на Блискиот Исток или сте со Доналд Трамп и Пит Хегсет додека нè туркаат во уште една војна?“, изјави пред гласањето лидерот на демократите Чак Шумер.
- „Демократите попрво би го спречиле Доналд Трамп отколку да ја уништат нуклеарна програма на Иран“, предупреди републиканскиот сенатор Џон Баросо.
- Претседателот Трамп оцени дека војната против Иран би траела четири недели, а министерот за одбрана Пит Хегсет вчера предупреди дека би можела да продолжи осум недели, бидејќи Иран сè уште има капацитет за ракетни напади.
- Администрацијата на Доналд Трамп нема јасен план за војната што ја почнаа со Иран, оцени демократскиот сенатор Крис ван Холен по брифинг во Белата куќа.
- „Нема објаснување зошто Трамп го прекрши ветувањето што ѝ го даде на земјата кога рече дека нема да нè вовлече во војни. Наративите за тоа за што всушност станува збор постојано се менуваат. Дури и денес во Овалната соба, претседателот даде различни објаснувања“, рече Ван Холен.
- „Велат дека целта е да се нападне нуклеарната програма на Иран. Но, знаеме дека Иран нема нуклеарно оружје. Претседателот лани изјави дека нивната програма е целосно уништена. Потоа велат дека одат на проектилите. Иран нема балистички ракети што можат да дојдат близу до САД, ниту една“, рече сенаторот.
- Трамп кажал и дека целта е ослободување на Иранците, иако проценките на ЦИА се дека ако биде соборено иранското раководство, на негово место ќе дојде уште порадикална група.
- Сенаторот оцени дека војната била поттикната од израелскиот премиер Бенјамин Нетанјаху. „Она што го знаеме од државниот секретар Рубио е дека Нетанјаху одлучил да го нападне Иран. Тој сака да го нападне Иран 40 години, само што не нашол претседател доволно глупав да ги вовлече САД во оваа војна. А сега Трамп го направи тоа. Тие немаат поим како треба да заврши ова“, заклучи сенаторот од Мериленд.
- Противвоздушните сили на НАТО собориле ирански балистички проектил насочен кон Турција, пред да навлезе во нејзиниот воздушен простор.
- Остатоците од пресретнувачките ракети паднале над округот Дортјол и не предизвикале жртви.
- „Турција ги поддржува мирот и стабилноста во регионот, но има капацитет да ја штити безбедноста на својата територија и граѓаните, без оглед од каде доаѓа заканата... Потсетуваме дека го задржуваме правото да возвратиме на секоја непријателска акција против нашата земја“, објави Министерството за одбрана.
- Воздухопловната база Инџирлик во Турција е под контрола на турските воздухопловни сили во рамките на НАТО, но функционира како заедничка турско-американска воздухопловна база. Инџирлик беше критичeн за логистичка и воздушна поддршка за операциите на САД во Заливската војна во 1991 година, а подоцна и како товарен центар за операциите во Ирак и Авганистан. Анкара не дозволи да биде употребена за инвазијата врз Ирак предводена од САД во 2003 година, но беше интензивно користена за напади против ИСИС по 2014 година.
- Во американскиот сектор во базата се чува тактичко нуклеарно оружје - до 50 атомски бомби од типот Б-61.
