- По ново Законот за извршување предвидува дека во моментот кога износот на каматата ќе порасне колку вкупната сума на основицата, тој престанува да расте. Со ова се спречува појавата на „должничко ропство“ во кое на пример за земен кредит од 100.000 денари враќаш по 600.000 заради камати.
- Измените на законот кој беа изгласани во Собранието ќе важат и за постапките за извршување кои се во тек.
- Една од злоупотребите на досегашниот закон беше правилото дека побарувањата застаруваат за 10 години, па доверителите чекаа да минат 9 години и 11 месеци, да се натрупаат камати, пред да ја почнат постапката за извршувања.
- По ново и рокот за застарување е скратен на 5 години.
- Хрватскиот парламент ги усвои измените во Законот за одбрана што опфаќаат враќање на задолжителна основна воена обука за млади мажи на возраст од 19 до 30 години. Исклучок се оние што ќе запишат факултет или спортисти што учествуваат на светски или европски првенства.
- Сите 18-годишни момчиња се регистрирани во воениот регистар и по лекарски преглед ќе бидат испратени на воена обука во календарската година кога ќе наполнат 19. Основната воена обука ќе трае два месеци, првите повици ќе почнат до крајот на оваа година, а првите регрути се очекуваат во касарните во Книн, Слуњ и Пожега на почетокот на следната година.
- Војничката плата ќе биде 1.100 евра месечно, а обуката ќе биде вклучена во работниот стаж. Невработените лица кои завршиле основна воена обука ќе имаат приоритет при вработување во државните и административните органи на локалните единици.
- Оние што одбиваат воени должности поради религиозни или морални убедувања ќе може да прифатат основна обука од три месеци во цивилна заштита или четири месеци во локални единици. Жените не подлежат на задолжителна регрутација, но можат доброволно да се пријават за основна воена обука.
