Вести › Набрзинка

Иран ракетира курдски бунтовници во Ирак

5 март 2026

Иран истрелал балистички проектили врз центри на курдски бунтовници во соседен Ирак, за да спречи инфилтрација на непријателски сепаратистички сили со намера да извршат терористички напади.
Целите на „превентивниот напад“ во северната ирачка провинција Сулејманија биле штабови на вооружената група на ирански курди Комала.
ЦНН и други американски медиуми деновиве објавија дека ЦИА одржува контакти со новоформираните Коалиција на курдските милиции од Иран, Ирак и Сирија за да се уфрлат во Иран и да поттикнат народно востание за соборување на режимот во Техеран.
Ерусалим пост синоќа објави дека „стотици курдски борци веќе ја преминале границата“, но извештајот беше отфрлен како „дезинформација“ од функционери од ирачкиот автономен регион Курдистан и од Револуционерната гарда на Иран.

23 април 2026

Зоран Ристовски – Ѓуза е новиот прв човек на јавниот сервис кој доби доверба од програмскиот совет на Македонската радиотелевизија да ја води медиумската куќа во наредниот тригодишен мандат.
Тој на оваа функција го наследува Марјан Цветковски кој беше на чело на јавниот радиодифузен сервис речиси 14 години.
Како негови конкуренти што се пријавиле на конкурсот, вкупно седум, биле и Тони Гламчевски, Искра Ребац, Перо Попов, Зоран Богатинов, Сотир Сотировски и Игор Себишки.
Извори на „Фокус“ присутни на седницата велат дека неговата програма на повеќе од сто страници се издвојувала по квантитет и студиозност во пристапот. Други програми биле напишани само на неколку страници, некои од нив најверојатно само со користење на вештачка интелигенција.

23 април 2026

Куќниот притвор на поранешниот вицепремиер и министер за политички систем, Артан Груби, му е продолжен за нови 30 дена.
Од затворски, Груби беше префрлен во куќен притвор на барање на Обвинителството кое таквата одлука ја донело врз основа на тоа дека се обезбедени голем број докази, дека истиот доброволно се пријавил на органите на прогонот (ма, срцка!), како и дека постојат индиции дека во притворското одделение не може да се гарантира неговата лична безбедност.
Груби е второосомничен во случајот со проневери во „Државна лотарија“. Избега од земјава уште пред Обвинителството официјално да отвори истрага а оо повеќе од една година во бегство, се појави на граничниот премин „Блаце“.
Првоосомничен Прпарим Бајрами, сè уште е недостапен.