Исечок од некој бугарски онлајн час по германски јазик. Наставничката го прозива Георги Лазаров. Тој се одзива на прозивката, со беспрекорна решеност да биде искрен. Откако го сослуша, наставничката можеше само да каже: „Георги, просто њамам думи, подобре е да продолжим нататак“.

Малку работи на овој хаотичен свет се стабилни и предвидливи. Гравитацијата, Халелевата комета, фактот дека сè посрање и посрање ни станува Македонија.... и календарот на Коста Бургов. Традиционално, нашиот драг Коста навреме ни го прати, со придружен текст, темелно прочистен од интерпункција. Спојлер: и следната година ќе ни понуди 365 дена, па кој колку издржи.      

Ауу, каков судар на паралелни светови е ова. Виктор Пастраскан, во Антверп, Белгија. Во публиката Албанец на кој нешто не му се бендисува па му дофрла да не збори за Албанија. „Добредојде на Запад,“ пробува да му објасни домаќинот. „Ќе се видиме после!“ му се заканува овој. А пошто Виктор е Романец па му е јасно, додава бензин: Има некој Србин да го среди дечково?