Христо Владимир Јавачев, попознат по своето уметничко име Кристо, беше најпознат по инсталациите кои изгледаа како огромни „пакети“, цели објекти покриени како за варосување. Тој и неговата сопруга „замотуваа“ морски брегови, карпи, острови, а како најспектакуларно до сега се смета покривањето на зградата на германскиот парламент во Берлин во 1995.
Кристо почина во мај 2020, и зад себе остави неколку неостварени проекти, меѓу кои и покривањето на Триумфалната порта во Париз. Наскоро ќе започне нејзиното замотување со 25,000 метри квадратни сина полипропиленска ткаенина, која може да се рециклира, и 3,000 метри исто така еколошко црвено јаже.
Првите планови на Кристо и неговата сопруга Жан-Клод за ваквата инсталација биле направени во 1962, кога тие двајца изнајмувале мала соба близу споменикот. Идејата е актуелизирана во 2017 и одобрена од градските власти на Париз и Центарот за национални споменици кое е одговорното тело.
Во 1985 Кристо го прекри Пон-Неф, еден од мостовите преку Сена. „Откривањето“ на покриениот споменик се планира за почетокот на септември. Целиот проект ќе чини 14 милиони евра и е целосно самофинансиран од наследниците, со продажба на дел од оригиналните дела на Кристо.
Освен пандемијата, проектот до сега беше одложуван и поради пролетното гнездење на ветрушките, постојани жители на Портата.
