Британецот Дејвид Хокни, кој почина на 88 години, зад себе остави огромно наследство кое ги надминува границите на сликарството. Тој беше уметник кој постојано ги преиспитуваше начините на гледање, создавање и доживување на светот - еве неколку интересни детали од неговиот живот.
Пионер на дигиталните технологии во уметноста
Хокни беше меѓу првите големи уметници кои ги прифатија дигиталните технологии како ново средство за креативност. Уште во времето на факс-машините и графичките табли тој експериментираше со дигитална уметност, а подоцна создаваше впечатливи пејзажи и цветни композиции користејќи ајфон и ајпад. Со тоа докажа дека вистинската уметност не зависи од алатката, туку од визијата на авторот.
Имал синестезија - „гледал“ звуци како бои
Една од неговите помалку познати особености била синестезијата – ретка појава при која човекот може да ги поврзува звуците со бои (за ова слушни епизода од подкастот Обични луѓе тука). Хокни „гледал“ бои додека слушал музика, а овој необичен дар често го користел при дизајнирањето сценографии за оперски претстави.
Одбил витешка титула
И во животот бил подеднакво неконвенционален како и во уметноста. Во 1990 година одбил да биде прогласен за витез, објаснувајќи дека не им придава големо значење на титулите и наградите. Сепак, подоцна ја прифатил поканата од кралицата Елизабета Втора да биде носител на престижниот Орден за заслуги. На еден од официјалните приеми во Бакингемската палата се појавил во впечатливи жолти крокс-сандали, останувајќи верен на својот опуштен и независен стил.
Тврдел дека пушењето го заштитило од Ковид
Неговата страст кон пушењето исто така стана дел од уметничките анегдоти. За прославата на неговиот 70-ти роденден во галеријата Тејт Британија, организаторите направиле исклучок и накратко ги исклучиле противпожарните аларми за да може славеникот да запали цигара по свечената вечера.
Бил опседнат со сликање базени
По преселбата во Лос Анџелес во 1964 година, Хокни бил фасциниран од сините базени и сончевата светлина на Калифорнија. Токму таму ги создал делата што ќе станат негов заштитен знак. Брзото сушење на акрилните бои му овозможувало да ги долови треперењето на водата и минливите ефекти на светлината, создавајќи слики кои и денес се меѓу најпрепознатливите во современото сликарство.
Автобиографијата му тежи 35 кила
Неговата творечка енергија остана присутна до длабока старост. За тоа сведочи и монументалната публикација „A Bigger Book“ (асоцијација на името на неговата позната слика A Bigger Splash), која самиот ја нарекуваше своја „автобиографија во слики“. Книгата има 500 страници, се отвора на широчина од два метра и тежи дури 35 килограми – вистински споменик на едно исклучително плодотворно творештво.
