Во својот краток живот, после кој премина во легендите, Елвис Присли бил многу нешта за многу луѓе: секс симбол, расипувач на младите, симбол на американскиот сон, зависник, крал на рокенролот, опсесивен јадач на сендвичи со крем од кикирики и банана, ултра-посветен христијанин. Но нова книга тврди дека славниот пејач бил и уште нешто: најголемиот окултен магионичар на светот.
Автор на нова книга под наслов „Окултниот Елвис: мистичниот и магичен живот на Кралот“, се опседнал со Елвис по церемонија со ајахуаска (психоактивен пијалок кој се користи во некои обреди за прочистување) во 2022. „Тој беше човек на пророштво, на искуството - мојата теза е дека тој бил најголемиот маг на западната цивилизација“, вели тој.
Книгата содржи материјали од различни извори, вклучително и од Присила Присли, од пријатели на Кралот познати како „Мафијата од Мемфис“, неговите духовни советници, како и неговиот личен фризер и гуру Лери Гелер. Тешко е да се каже каде е границата помеѓу документарното и измисленото, но книгата нема амбиција да биде историски коректна - тоа е духовна биографија зачинета со сосптвените теории на Конер и повремени завлегувања во јунговски анализи.
Сепак, тој не е прв со ваков пристап. Духовниот живот на Присли е истражуван во книги како онаа на Дејвид Розе, „Тао на Елвис“, објавена во 2001 и „Елвис: потрагата по повисока свест како што е прикажано низ неговите белешки“. Последнава е напишана пред две години од Ингрид Де Ла О, со истражување на огромната и анотирана (со лични белешки напишани од Елвис) на неговата голема библиотека.
Елвис, имено, имал прочитано над 1000 книги за различни аспекти на њу ејџ спиритуалноста и бил многу сериозен во врска со ова. Во еден момент сакал и да се откаже од музиката за да формира сопствена комуна во која би се подучувала „крија“ јога.
Во „Окултниот Елвис“ пак дознаваме за талентот на Присли за манипулација на времето. Наводно со едно замавнување на раката можел да го истера дождот, за на пример пријатели да играат бадминтон на неговиот имот во Грејсленд. Има сведоци на кои тој им признал дека не е од оваа планета туку од деветата месечина на Јупитер. Присли верувал во вонземјани и велел дека имал неколку средби со нив. Еднаш на својот телохранител Сони Вест му рекол: „Ако нè контактираат, не треба да се плашиме, затоа што нема да нè повредат“.
За малку контекст, родителите на Присли биле исто така религиозни. Тие се сретнале преку пентекостализмот, кој се фокусира на директна врска со Бог преку исцелување и ритмичко танцување - точно она што влијаело врз генерации музичари, од Литл Ричард, ББ Кинг, Џери Ли Луис и Џони Кеш. Рок музиката во оваа смисла никогаш не била само форма на забава туку и „шаманистичка спиритуалност“. А ако музичарите се шамани, тогаш Присли секако бил еден од најголемите.
