Иако во насловот го носи предзнакот „историја“, новата книга на Дејвид Брн „Историја на светот во орнаменти“ е всушност визија за еден нов свет, на нагласена солидарност и истражување на возможното, визија на животот кој не е само ресетиран после пандемијата, туку и ревитализиран и рекалибриран - живот кој е малку по...жив.
Орнаментите за којшто станува збор се наречени „дингбати“ или печатарски орнаменти, а нивното име доаѓа од „динкус“ - разделник на пасуси и поглавја. Цртежите се на самиот Брн, а дизајнот на книгата на Алекс Калман. Преку користење на вакви техники Брн ги нагласува идеите во книгата.
На пример во првото поглавје насловено „Заспаната убавина“, тој вели: „Низ историјата, некои идеи, врски, перспективи и технологии се појавиле но потоа подзаспале. Брилијантни пронајдоци, приказни и техники можат да исчезнат од нашиот вид, понекогаш и долги периоди, да хибернираат додека некој не ги разбуди“.
Ова важи како за физички предмети, така и за идеи. Некои се „познати непознати“, како исчезнатите дела на Аристотел или Шекспир - знаеме дека постојат но се загубени. Други се „непознати непознати“ - дела и идеи кои се толку невидливи за нас што сме заборавиле дека постојат. Како што навлегуваме во нов свет можеби конечно ќе ги симнеме превезите и ќе ги видиме насекаде околу нас.
Цртежите пак се споредуваат со помалку познатите кроки-дела на американскиот поет Е. Е. Камингс. На Брн му тргнало со нив во текот на пандемијата, за да ги изрази „мислите за своето тело, менталната состојба, приоритетите и вредностите, домашната рутина и светот вон куќата или станот“, за она што е вистински важно. Забележал дека цртежите се групираат во категории на мисли и чувства. Така тие почнале да формираат дневник на деновите поминати во интроспекција и креативна осама.
„Историјата на светот се приказните кои си ги кажуваме. Иако постојаноста на пишувањето го има забавено процесот, овие приказни не се фиксирани. Тие постојано се ревидираат и се менуваат. Историјата не е она што се случило, туку она за што се согласуваме дека се случило - моделирано од нашите предрасуди и интереси“, вели Брн.
