Лична велосипедска незгода по која кацигата му била тотално уништена му донела и еурека момент на еден досетлив дизајнер кој тврди дека картонот може да биде многу поефикасна заштита од сегашните решенија на заштитни кациги.
Клучниот проблем е како мозокот како мек и пливачки орган да намали брзина кога черепот неочекувано ќе биде сопрен од удар во бетон или друга тврда препрека.
Инспирација за картонскиот шлем на британскиот Индиец Анируда Сураби е природната заштита на клукајдрвецот кој удира десетпати во секунда со брзина рамна на судар на 80 километри на час и ич глава не го боли.
Решението е изработено како двоен картон со мрежаста структура во форма на пчелино саќе. При удар, воздушните џебови пукаат и го апсорбираат ударот со што на мозокот му се даваат екстра милисекунди да ја забави инерцијата и да удри поблаго во черепот што некогаш може да значи и спасување живот.
Картонската кацига е веќе во продажба и била многу популарна кај велосипедистите кои бараат алтернативи на доминантно присутните полимерни решенија.
Во суштина, и натаму трае дебатата дали кацигите воопшто им помагаат на велосипедистите. Една причина за сомнеж е самата ефикасност на стиропорот да амортизира удар а втора е психолошкиот момент, што велисепист кој носи кацига мисли дека е заштитен па вози дополнително ризично.
