Синовите на Хелмут Кол тврдат дека татко им живее во куќен притвор. Валтер и Петер Кол јавно ја обвинија сопругата на нивниот татко дека го држи во комплетна изолација од блиските и пријателите и има целосна контрола врз неговиот живот. Ускратени му се и контактите со долгогодишните соработници и пријатели и практично неподвижен се чува во бунгалов кој го дели само со жената.
Претходната сопруга на Хелмут Кол и мајка на неговите два сина си го одзема животот во 2001-ва година отако се разболе од ретка и тешка алергија на светлина.
Кол во 2008-ма се прежени со 48 годишната Мајке Кол Рихтер, на свои 78 години.
Оттогаш таа полека ја презема контролата врз неговиот живот а заради таа посесивност печатот веќе ја нарече Леди Магбет.
"Вратата ми ја отвори Мајке и ладно ме упати кон дневната соба каде што седеше татко ми. Очигледно се израдува што ме гледа мене и што сум ја донел внука му. По некое време ми рече: Подобро да си одите, оти ќе си имам проблеми," сведочи за Шпигл помладиот син на Хелмут Кол.
Рестрикциите таа ги засилила по речиси фаталниот инфаркт во 2008-ма по кој Хелмут Кол oстана парализиран и со отежнат говор. Проблеми со неа имаат и политичките историчари бидејќи не можат да допрат до драгоцената архива и преписки кои ги има Кол а се во нејзина контрола.
