МЗТ Скопје поведе со 2:0 во финалната серија против Фени индустри што се игра до четири добиени натпревари.
Гостите од Кавадарци имаа предност од десет поени во првата четвртина, но домаќините со фантастична серија од 23:2 бргу ја анулираа негативата и дојдоа до плус 13.
Но со неколку тројки во последната четвртина, кошаркарите на Фени намалија на четири разлика и ја најавија неизвесната завршница.
На 39 секунди до крајот, негативата на Фени изнесуваше само еден поен (79:78), а во следниот напад Мијајловиќ реализираше едно слободно фрлање за 80:78.
Меч топката во свои раце ја имаше Лилов, но тој не реализираше во обидот за три поени и кошаркарите на МЗТ триумфираа со 80:78.
Најефикасен кај МЗТ беше Мијајлович со 23 поени, а Чековски натпреварот го заврши со 17 поени и 9 скокови. Во поразената екипа се истакнаа Николовски со 27 и Лилов со 18 поени.
