- Директорка во Клиничкиот центар во Скопје и актуелен член на Управниот одбор на Македонски телеком Шкодране Дардишта, членка на ДУИ, на својот фејсбук-профил отворено се закани со војна.
- „Сѐ уште ги имаме чизмите на таван во старата куќа, за час ги вадиме белите патики. Ние не сме сираци, ние сме никнале после војна. Не играјте со оган, затоа што на крај сами ќе изгорите во него,“ пишала Дардишта, лоцирајќи се во „Скопје, Илирида“.
- „Шкодране Дардишта кадар на ДУИ се заканува со војна ако на нејзината партија не ѝ се дозволи да продолжи да ја силува државата! Ама ова во нашиот политички дискурс е потполно легитимно за разлика од фашизмот и нацизмот на Левица нели!?“, реагира Борис Крмов од Левица.
- САД ќе ѝ предадат на Европа две од најважните командни места на НАТО - здружените команди во Неапол и во Норфолк, Вирџинија. На двете позиции сега се американски адмирали.
- „Сојузниците се согласија за нова распределба на одговорностите на високите офицери низ целата командна структура на НАТО, во која европските сојузници, вклучувајќи ги и најновите членки, ќе играат позначајна улога во военото раководство на Алијансата“, изјави анонимен функционер за Ројтерс.
- САД ќе задржат свои генерали како Врховен командант на сојузничките сили за Европа и на челото на воздухопловните, копнените и поморските команди, кои се особено важни, иако се хиерархиски пониски позиции.
- Ротацијата на генералите е во согласност со барањата од Доналд Трамп европските нации да преземат поголема одговорност за сопствената безбедност.
- Гислен Максвел одби да одговора на прашања од Комитетот на Конгресот во рамки на истрагата за нејзиниот поранешен партнер Џефри Епстин. Се повика на правата од Петтиот амандман да не дава изјави што би можеле да бидат инкриминирачки за неа.
- Таа требаше да сведочи од затворот во Тексас, каде што отслужува казна од 20 години затвор поради сексуална злоупотреба на малолетнички.
- Оскар Маркус, адвокатот на Максвел, изјави дека ако претседателот Доналд Трамп ѝ одобри помилување, таа е спремна да сведочи дека ниту Трамп ниту поранешниот претседател Бил Клинтон немале ништо спорно во врските со Епстин. „Само госпоѓата Максвел може да објасни зошто и јавноста е должна да го чуе објаснувањето“, изјави Маркус.
- Максвел упорно тврди дека е лажно обвинета и побара да ѝ биде поништена казната. Врховниот суд лани ѝ го отфрли барањето, но во декември таа побара од федерален судија да разгледа „важни нови докази“ за прекршување на Уставот при судскиот процес против неа.
- Пред Надзорниот комитет на Претставничкиот дом при крајот на февруари треба да сведочат и поранешниот претседател Клинтон и неговата сопруга Хилари во истрагата за случајот Епстин. Тие побараа сослушувањето да биде јавно, а не зад затворени врати како што предвидува Комитетот.
