Поранешниот градоначалник на Карпош, Стевчо Јакимовски, на 2 јули ќе треба да влезе во Истражниот затвор „Скопје“ во Шуто Оризари.
Основниот кривичен суд Скопје претходно објави дека со пресуда на Апелацискиот суд, Јакимовски правосилно е осуден на една година затвор во врска со изградбата на општинската зграда во Карпош.
Во казната му се смета и времето од пет месеци кое го помина во притвор. Останува во затворот во Шуто Оризари да помине уште седум месеци од казната.
Јакимовски соопшти дека ќе бара одложување на извршувањето на затворската казна.
Целосна демонтажа потврдува дека мобилниот телефон Trump Mobile T1 промовиран од претседателот Трамп е целосна копија на моделот HTC U24 Pro, кој од пред две години се произведува во Кина.
„Сè е исто, освен шемата на дупките во куќиштето“, заклучуват мајстори од порталот iFixit, кои го расклопиле телефонот до шрафче.
Оригиналот и копијата биле функционални дури и кога им биле заменети матичните плочи.
Цената на оригиналниот кинески телефон од средна класа е околу 470 долари (564 евра за европскиот пазар). Трамп го нудеше по привилегирана цена од 499 долари, за оние што платиле капар од 100 долари.
„Трамп Мобајл“ тврди дека добил 600.000 нарачки и се надева дека ќе продаде околу 30.000 телефони.
Од денеска на сила стапува новиот Пакт за миграција и азил на ЕУ – пакет од десет реформи што опфаќаат построги контроли на границите, обработка на барањата за азил и депортациите и порамномерно ја распределива одговорноста за сместување на мигрантите низ земјите-членки.
Барателите на азил од „безбедни“ земји или оние што претставуваат потенцијална закана за безбедноста се соочуваат со забрзано тримесечно време на обработка и се ограничени на една можност да поднесат жалба за одбиено барање.
Се дава приоритет на брзо враќање на лицата кои не ги исполнуваат условите за азил, се прошируваат овластувањата за депортации и се овозможува отворање центри за репатриација.
Новата биометриска база на податоци (Еуродак) собира отпечатоци од прсти и фотографии на лицето од сите мигранти - вклучително и деца на возраст од шест години - за да ги следи нивните движења и да спречи неовластено патување во рамките на блокот.
Земјите што се најсилно оптоварени со миграција ќе добијат загарантирана помош од другите членки на ЕУ – да примат дел од мигрантите или да обезбедат директна финансиска поддршка.
