- Левица поднесе кривична пријава против актуелната владина членка на Одборот на директори на АД „Телеком“ Шкодране Дардишта, поради сомневање за „Предизвикување омраза, раздор или нетрпеливост врз национална, расна, верска и друга дискриминаторска основа“ – казниво по чл. 319, ст. 1 од Кривичниот законик на РМ, со запретена затворска казна од една до пет години.
- Пријавената се терети дека преку Фејсбук објавила заканувачки статус во кој се повикува на Војната од 2001 година, во која животот го загубија стотици македонски граѓани.
- Кривичното дело е сторено против државата и нејзините државјани, со цел да се повредат националните чувства на Македонците, а инспирирано од длабока национална омраза и меѓуетничка нетрпеливост.
- Пентагон склучи договори од по 200 милиони долари со водечките американски компании за развој на вештачка интелигенција: Антропик, Гугл, ОпенАИ и xAI, за да помогнат за решавање на критичните предизвици за националната безбедност на САД.
- „Примената на ВИ ги трансформира капацитетите на Пентагон за поддршка на нашите борци и за задржување на стратегиската предност во однос на нашите соперници“, објави Министерството за одбрана.
- Илон Маск, сопственикот на xAI, го објави проектот Грок за владата, иако најновата верзија на четботот неодамна „збесна“ со антисемитиски коментари. Посебни верзии на Грок 4 ќе бидат прилагодени за потребите на разни клиенти во федералната администрација.
- Доналд Трамп најави дека САД ќе ѝ дадат најмодерно оружје на Украина (кое ќе го платат сојузниците од НАТО), а на Русија ѝ се закани со тарифи од 100% ако во рок од 50 дена не ја прекине војната.
- Претседателот најави дека 17 противвоздушни системи Патриот може да ѝ бидат испорачани на Украина за неколку дена. Европските членки на НАТО ќе ѝ ги достават своите, а ќе ги заменат со нови купени од САД.
- Ако Москва до крајот на август не ја запре војната, САД ќе воведат секундарни тарифи за нејзините трговски партнери. Секоја земја што тргува со Русија ќе се соочи со царини од 100%. Тоа важи и за редовните купувачи на руска нафта, која сочинува 60% од извозот на Русија.
- Трамп изјави дека е фрустриран од рускиот претседател Владимир Путин, за кој кажа дека зборува за мир, но продолжува да ги бомбардира украинските градови.
- „Кога тоа ќе се случи три или четири пати, ќе сфатите дека разговорите не значат ништо. Не сакам да го наречам убиец, ама тој е цврст тип. Се покажа низ годините, насамари многумина - Клинтон, Буш, Обама, Бајден. Не ме насамари мене. Во некој момент ќе почнете наместо со зборови да разговарате со акции“, изјави Трамп.
