Куба, извини за нашите вазали
30 октомври 2025
- Македонија беше меѓу седумте земји во светот што се построија на ѕидот на срамот во ОН и гласаа ПРОТИВ укинувањето на американските санкции за Куба, кои се на сила веќе 63 години. Резолуцијата беше усвоена со огромно мнозинство од 165 гласа. Дванаесет земји беа воздржани, а против гласаа – САД, Македонија, Израел, Украина, Унгарија, Парагвај и Аргентина.
- Резултатите, иако не онакви какви што сакаше Вашингтон, беа дел од стратегијата на оваа северна нација во неделите пред гласањето... Белата куќа ги употреби сите свои оружја и трикови, особено принудата, но вистината, законот, разумот и правдата се секогаш помоќни и поубедливи. Уште еднаш, мнозинството од меѓународната заедница е на страната на Куба. Како што рече претставникот на Никарагва во ОН: „Солидарноста е посилна од уцената“, пишува кубанскиот државен весник „Гранма“.
- Лани против укинување на санкциите за Куба беа само САД и Израел. Македонија во изминатите три години гласаше за укинување. Резолуцијата не е обврзувачка, но е моќен дипломатски израз на поддршка на земјата што е повеќе од половина век под санкции. „Блокадата е политика на колективна казна. Таа е флагрантно, масовно и систематско нарушување на човековите права на Кубанците“, изјави шефот на кубанската дипломатија Бруно Родригез.
- Пред две години, на приемот на новоназначената амбасадорка на Куба во Македонија, пратеници ѝ порачаа: „Земјава придава големо значење на натамошниот развој на пријателските односи и севкупната соработка со Куба, заинтересирани сме за унапредување на соработката во сите области и за подигнување на динамиката на политичкиот дијалог на парламентарно нивно“.
- Амбасадорката Мариета Гарсиа Хордан кажа дека „во нас гледа како на многу добри пријатели“ и истакна дека историската врска е подолга од 20-годишните билатерални односи. Се заблагодари за „одличната“ соработка во ОН, со заемно поддржување на кандидатурите за членство во различни тела. Притоа беше забележано дека Куба „традиционално и континуирано добива поддршка од Македонија при гласањето на Резолуцијата на Генералното собрание на ОН за целосно укинување на економското ембарго на САД против Куба“.
- Познати како „блокада“ меѓу Кубанците, најдолготрајните економски санкции во модерната историја забрануваат трговија, инвестиции и финансиски трансакции меѓу САД и Куба. Хавана тврди дека кубанската економија претрпела штета од 144 милијарди долари до 2021 година. Најмногу трпат обичните граѓани – празни продавници, високи цени, сиромаштија, глад и здравствени проблеми. Со часови се чека во ред за ориз, грав, месо или млеко, достапни само преку купони. Цените на црниот пазар се зголемуваат драстично. Многу семејства се ограничени на еден оброк дневно. Иако храната и лековите беа исклучени од блокадата, Куба има пристап само до 50-70% од новите лекови, главно произведени во САД. Нема доволно инсулин, антибиотици, лекови за рак, вентилатори и заштини маски. Ова доведува до епидемии и зголемена смртност од хронични болести. Лекарите мораат да импровизираат, а пандемијата ја влоши ситуацијата. Поради ограничен пристап до гориво, резервни делови и хемикалии, има секојдневни рестрикции на струја. Просечната плата е 20-30 долари, што едвај ги покрива основните потреби.
