Обвинителството во Вашингтон отвори кривична истрага против Џером Пауел, шефот на Федералните резерви на САД, во врска со лажно сведочење за реновирањето на седиштето на Централната банка во вредност од 2,5 милијарди долари.
Истрагата се поврзува со обидите на претседателот Доналд Трамп да го разреши Пауел, кој упорно ги одбива сугестиите од Белата куќа за намалување на каматните стапки. На оваа позиција Трамп планира да го постави својот долгогодишен економски советник Кевин Хасет.
„Никој, па ни претседателот на Федералните резерви, не е над законот, но оваа невидена акција треба да се гледа во поширок контекст на заканите и континуираниот притисок. Се работи за тоа дали Федералните резерви ќе можат да ги одредуваат каматните стапки врз основа на докази и економски услови, или монетарната политика ќе биде водена од политички притисок и заплашување“, изјави Пауел.
Судовите веќе ги отфрлија барањата од Министерството за правда за судски процеси против други политички противници на Трамп – поранешниот шеф на ФБИ, Џејмс Коми, кој ја водеше истрагата за руското мешање во изборите во 2016 година, и главната обвинителка на Њујорк, Летиција Џејмс, која поднесе тужба за граѓанска измама против Трамп во 2024 година.
Норвешката полиција синоќа го уапсила Мариус Борг Хојби, 29-годишниот син на принцезата Мете-Марит и посинок на принцот Хакон, поради нови обвинувања за нанесување телесни повреди, закани со нож и прекршување на забраната за движење.
Поради новите обвиненија може да биде задржан во притвор четири недели.
Хојби утре требаше да се појави на суд во врска со посебно обвинение од 38 точки за силување, семејно насилство, напад и поседување дрога. Му беше дозволено да се брани од слобода.
Случајот беше отворен во 2024 година, откако полицијата го осомничи Хојби за физички напад врз жена со која бил во врска. Тој призна дека ѝ нанел телесни повреди на жената додека бил под дејство на кокаин и алкохол и дека го оштетил нејзиниот стан. Ги отфрла обвиненијата за силување.
Исламската Република Иран сега ги смета за „терористички“ војските на сите членки на Европската Унија, како реципрочен одговор откако ЕУ ја прогласи иранската Револуционерна гарда за терористичка група.
„Со обидот да ја нападнат Гардата, која всушност е најголемата пречка за ширење на тероризмот во Европа, Европејците пукаа во себе. Преку слепа послушност кон Американците, донесоа одлука против интересите на сопствениот народ“, изјави претседателот на парламентот, Мохамед Багер Калибаф, кој порано беше командант на Револуционерната гарда.
Како симболичен протест, сите пратеници на седницата биле облечени во униформи на Гардата.
Министерството за надворешни работи објави дека ова е „минималната контрамерка“ на Техеран. Биле разгледани низа мерки и на надлежните тела им биле испратени предлози за одговор на „незаконскиот, неразумен и многу погрешен потег на ЕУ“.
Портпаролот Есмаил Багеи додаде дека се повикани на разговор сите амбасадори на ЕУ во Техеран.
