Вести › Набрзинка

Конгресот отвори процес за отповикување на Хегсет

10 ноември 2026

Републиканскиот конгресмен Томас Маси ја почна постапката за отповикување на секретарот за одбрана Пит Хегсет поради „злоупотребување на овластувањата“ и „свесно спроведување незаконски наредби“ во врска со војната против Иран.
Три од осумте точки наведени во барањето на Маси го обвинуваат Хегсет за кршење на воените овластувања за Иран. Конгресменот тврди дека војната е неуставна бидејќи администрацијата на Трамп го почнала конфликтот без одобрение од Конгресот и продолжила со воените дејствија иако законодавниот дом побарал Пентагон да ги прекине.
Во другите точки е обвинет за злоупотреби кои предизвикале цивилни жртви, напади врз бродови осомничени дека транспортираат дрога, одмазда против сенаторот Марк Кели, грабнувањето на венецуелскиот претседател Николас Мадуро и воените операции во Јемен.
„Отповикувањето на Хегсет е најдобриот потег што можете да го направите во моментов, за да се дистанцирате од неуспешната политика на оваа војна во Иран“, им порача Маси на републиканците во Конгресот.
Дури и ако Претставничкиот дом го отповика Хегсет, за негово разрешување од функцијата ќе биде потребно двотретинско мнозинство во Сенатот, кој во овој состав до 3 јануари е под контрола на републиканците.

извор

Почина убиецот од Краков

9 ноември 2026

Михал Оксињски, 24-годишниот Полјак осомничен за убиство на шест лица во Краков во саботата, денеска почина во болница по три неуспешни хируршки операции.
Пукајќи од возило во движење, Оксињски смртно застрела шест лица – четворица Полјаци, Британец и Австријка, и рани уште 15, вклучувајќи петмина странци. Беше ранет по бркотница и престрелка со полицијата.
Обвинителството смета дека Оксињски е одговорен и за убиството на своите родители и 21-годишната сестра. Нивните тела со прострелни рани беа откриени во семејниот дом во градот Островјец Свјентокшиски.
Во автомобилот на напаѓачот биле пронајдени две пушки, два пиштоли и околу 500 парчиња муниција. При нападот испукал „десетици, а можеби дури и неколку стотици“ куршуми.
Од март годинава имал дозвола за носење огнено оружје и посетувал стрелачки клуб заедно со својот татко, но немал криминално досие и не ѝ бил познат на полицијата.
„Засега немаме доволно информации за да утврдиме мотив“, изјави портпаролот на Националното обвинителство, Пшемислав Новак.

извор

Братот на Виктор Орбан приведен поради шверцување луѓе

9 ноември 2026

Арон Орбан, братот на поранешниот унгарски премиер Виктор Орбан, е приведен под сомнение за шверцување луѓе.
Канцеларијата за заштита на имот и Националното биро за истраги објавија дека извршиле координирани рации и претреси во Будимпешта во случај против криминална група која обезбедувала дозволи за престој во Унгарија врз лажни основи на вработување.
Според неофицијални извештаи на локални медиуми, компанијата на Арон Орбан запишувала виетнамски државјани на дводневни курсеви за прва помош на Универзитетот во Печ, што им овозможувало полесно да добијат шенген-визи.
„Целта на оваа валкана игра е да се елиминира политичкиот противник и да се изгради еднопартиски систем. Јас сум целта, а мојот брат е само средство за постигнување на целта“, порача на Фејсбук поранешниот премиер Виктор Орбан.

извор