Нов документарец за љубовта меѓу Коен и неговата Мериен

Во 2016, по повод смртта на Мериен Илен, долгогодишната придружничка на Леонард Коен, тој ѝ напиша трогателно писмо, кое ја потсети јавноста на нивната врска. Можеби токму тоа било инспирација за режисерот на новиот филм, под наслов „Зборови на љубовта“.

Токму со зборовите од спомнатото писмо (кое на времето го објавивме тука) почнува и трејлерот за документарецот. Коен во него вели: „Најдрага Мериен, знај дека сум многу блиску зад тебе, и дека ако ја испружиш раката можеш да ја допреш мојата“, со тоа најавувајќи ја и сопствената смрт, која се случи помалку од четири месеци подоцна, на 7 ноември 2016.

Режисер на филмот е Британецот Ник Брумфилд, кој до сега има режирано голем број документарци посветени на музичари, како „Курт и Кортни“ од 1998, „Биги и Тупак“ од 2002 и „Витни“ од 2017. Овој за Коен и Мериен премиерно беше прикажан на фестивалот Санденс оваа година, а користи претходно необјавени снимки направени и од самиот Брумфилд и од режисерот Д. А. Пенебејкер.

„Исто толку поезија, колку и документарец, нежен и рапсодичен филм“, или „емоционален бокс“, беа оценките на критиката. Ова е трејлерот, а вонфестивалската премиера се очекува на почетокот на јули.

23 мај 2019 - 16:41