Џон Берд бил роден во 1888 година во шкотскиот град Хеленсбург. Од детството бил болникав и имал „слаба конституција“, но имал љубопитен ум и голема упорност. На тринаесет години веќе направил приватна телефонска мрежа за своите пријатели и поставил електрична светилка во куќата на своите родители, иако во градот сè уште немало струја. Еден експеримент дури завршил со негово труење со олово и лузна на прстот што ја носел целиот живот.
Од четиринаесет години почнал да експериментира со телевизија и се посветил на таа цел. Работел со дискот на Нипков, изум од 1884 година, преку кој сликата се скенирала линија по линија. Експериментите биле опасни – во 1924 година преживеал струен удар. „Докторот се чудеше како сум уште жив“, напишал подоцна.
За неговиот систем била потребна силна светлина, која пак создавала топлина што луѓето поставени пред камера не можеле да ја издржат. Затоа ја користел куклата Стуки Бил – глава од гипс и дрво со црна боја и вистинска коса. Лицето било со јак контраст и погодно за пренос. Моќните светилки ја гореле косата и ја напукнувале бојата, но куклата „ја издржувала“ топлината.
На 2 октомври 1925 година, лицето на Стуки Бил се појавило на екранот – првата вистинска ТВ-слика со тонови и детали. Во 1928 година, неговото лице било и првата слика пренесена преку Атлантикот.
Името „Стуки“ потекнувало од шкотски збор за гипсена фигура, а „Бил“ бил само прекар. Сепак, интересно е римувањето со „спуки“ - морничаво.
Иако во 1930-тите електронската телевизија на Фарнсворт и Зворикин станала супериорна и механичките системи излегле од употреба, Берд продолжил да придонесува и работел и на колор телевизија. Починал во 1946 година на 57 години, пред телевизијата да стане масовен феномен.
Стуки Бил, пак, останал зачуван. Денес се наоѓа во Националниот музеј за наука и медиуми во Бредфорд, каде што сведочи дека токму тој бил првиот телевизиски лик во историјата.
