Нашите ракметари уште на стартот се наметнаа како фаворити на овој дуел и средбата ја отворија со водство од 2:0 преку Миркуловски и Манасков. Алжир возврати со погодок, но потоа следуваа два гола на Лазаров од пенал и погодок на Мојсовски од игра за предност од 5:1.
Македонија на средина од првиот дел влезе во мала криза при водство од 7:3, кога алжирскиот голман одбрани три удари по ред, а исклучени беа и двајца наши ракометари. Алжир не профитираше многу од тоа и намали на само -2.
Играта на избраниците на Обрван во продолжението од мечот се градеше преку пикерските позиции, а таму во елемент влезе Столе Стоилов кој стрелаше во три напади по ред. Потоа следуваше и првиот гол на Геогриевски за предност од +5.
Македонските репрезентативци го одржуваа водство и на полувреме заминаа со 14:10. Идентично како на подготвителниот меч против Израел, селекторот Обрван пред Мундијалот во Катар ги испроба и резервните оружја од клупата.
Ренато Вугринец одлично ги искористи минутите и постигна три погодоци, а пред голот на Алжирците се наредија и Златко Мојсовски, Недановски и Велко Марковски.
Машинеријата функционираше перфектно во напад, без падови во играта, а тоа придонесе за две серии. Најпрвин од 3:0 за водство од +7 голови разлика, а потоа и 4:0 за двоцифрена предност од 26:15.
И покрај високата предност, нашите ракометари не се опуштија. Во првиот дел Борко Ристовски одбрани 9 удари, а во вториот дел голот одлично го чуваше Петар Ангелов. Во последните минути Манасков почна со убиствени контри, а Македонија обезбеди убедлива победа од 32:20.
Најпрецизен во нашиот состав беше Дејан Манасков со 7 голови, а Лазаров постигна шест.
Турнирот во Нант завршува утре со финалето помеѓу Македонија и Франција од 18 часот.
