Александар Трајковски дефинитивно е светла точка во македонската репрезентација. Поранешниот фудбалер на Палермо веќе две сезони ја грее клупата на Мајорка, најчесто од клупа ги почнува и натпреварите за репрезентација, но кога ќе добие шанса максимално ја користи.
Мундијалските квалификации ги стартуваше како најдобар поединец, со три гола по првите две кола и од синоќа е стрелец број 2 во македонската репрезентација со 18 погодоци.
Пред него е Горан Пандев со двојно повеќе голови, а после него се Ѓорги Христов и Артим Шаќири.
Трајковски влезе како џокер на гостувањето против Романија и постигна гол за 2:2, а синоќа против Лихтенштајн даде два комада за три минути.
Лихтенштајн му е омилен пациент против кој два пати реализираше во Скопје и во групната фаза од Лига нации, а исто така и еднаш во Струмица на претходните мундијалски квалификации.
На тој циклус за СП 2018 го постигна и убавиот гол против Италија на гости, кога Пандев му сервираше топка, а тој ладнокрвно го совлада Џиџи Буфон за изненадувачки 1:1 во Торино.
Поранешниот соиграч на Нестор во Палермо има премала минутажата откако направи трансфер во Мајорка и обично натпреварите ги почнува како резерва.
Во првата сезона во Ла Лига имаше 14 настапи и ниту еден постигнат гол, а сезонава одигра на само 7 второлигашки средби, повторно без погодок, со исклучок на еден во Куп.
Но тоа воопшто не се забележува во игрите за репрезентација и некако тивко во сенка на Елмас, Пандев, Барди и другите најекспонирани првотимци, се појавува и демонстрира голема професионалност и игра со срце за Македонија.
Инаку Трајковски на 12 ноември 2015-та го одбележа дебито на Игор Ангеловски со хет-трик на пријателска против Црна Гора и стана четврти македонски репрезентативец со таков дострел. Претходно тоа им успеа на Бошко Ѓуровски, Дејви Главевски и Артим Шаќири.
Александар Трајковски со постигнати 18 голови за националниот тим е втор стрелец на „вечната листа“ на стрелци, веднаш зад Горан Пандев. 😎
— FFM (@ffmmkd) March 29, 2021
Честитки Аце! 🎇🇲🇰⚽️#АлександарТрајковски#НапредМакедонија#ЗаедноДоПобеда pic.twitter.com/FY9mVY5JWo
