Off Café › Набрзинка

Книга: Лош секс

8 август 2022

Ако се мислите што да читате, The Cut има извадок од книгата „Лош секс: Вистина, задоволство и незавршена револуција“ на Нона Вилис Ароновиц.
Басл и Есквајер ја нарекуваат „најочекуваната книга годинава“, а Њујорк Тајмс ја смета за „Интимна, внимателна и пристапна за секој што се мачи со упорните, излудувачки потешкотии со современиот секс.“

„Шест месеци поминаа откако раскинавме, кога Арон го најде списокот со „за“ и „против“. Беше скинат од жолта тетратка, веројатно за да можам да го ставам на некое подискретно место, или да го фрлам. Сепак, имаше и датум, 21 ноември 2013.

Го напишав за време на првото соло патување во Франција за работа. Прво концептот беше долг викенд надвор од Њујорк, но некако се најдов на Ербиенби, разгледувајќи симпатични француски куќички - вистинскиот сетинг за романтично бегство со самата себе. За време на оваа потрага го научив зборот gîte (колиба), и дека не можам да си дозволам таква на местата за кои имав чуено, како Прованса, но можеби можев во планинска област на југот со име Севен. Местото разумно се поклопи со мојата фантазија за осаменост наспроти позадина од средновековен гипс, недопрена од современиот свет.

Букирав гит и авионска карта.“

На Амазон - тука.

извор

Им поминува ли модата на ултра-скапите чанти?

28 септември 2026

Авторката Кејт Листер остро ја критикува чантата Биркин на Ермес како еден од најекстремните симболи на раскош и економска нееднаквост. Вели, чантите чинат десетици илјади фунти, а ретките примероци и стотици илјади, а нивната огромна цена не е оправдана со функционалноста, туку со престижот и желбата да се покаже богатство.
Мета на критика е и културата околу сето тоа, промовирана од славни личности, инфлуенсери и ултрабогати луѓе. Според неа, апсурдот не е само во тоа што една чанта може да чини повеќе од годишната плата на медицинска сестра, туку и во фактот што ваквото расфрлање со богатството се слави како статус и успех, наместо да предизвикува непријатност во време кога многу луѓе живеат во сиромаштија.
Смета дека Биркин можеби го губи статусот на престижен предмет бидејќи станала премногу присутна во културата на славните и почнала да се смета за кич. Посакува свет во кој луѓето ќе се гордеат со огромни донации каде што се потребни, не со фотографии каде што држат луксузни чанти.

извор

Изводливо ли е човек кај нас да си се повлече во село?

28 септември 2026

Авторот Бен Коб, по години поминати во Лондон како уредник и писател, во 2024 година со сопругата се преселил во Котсволдс, иако првично нивната стара куќа од 1605 година требало да биде само викендичка. Реновирањето било многу поскапо и покомплицирано од очекуваното, но тие успеале да го зачуваат карактерот на историскиот дом, со антиквитети, стари ткаенини, тапети и внимателно избрани бои.
Најголемото изненадување бил новиот живот во малата заедница. Наместо очекуваната изолација и мир, Коб и сопругата стекнале нови пријатели и откриле дека селото има богат социјален живот, со вечери, коктели, отворања на ресторани и дури и повремени забави во штала. Токму преку новите познанства се родила и идејата за негова нова машка модна колекција инспирирана од животот во Котсволдс.
По две години, Коб вели дека преселбата целосно му го променила животот. Почнал да се занимава со градинарство и пилатес, пронашол чувство на смиреност што долго му недостигало и, парадоксално, почнал уште повеќе да го цени Лондон.

извор