Вести › Набрзинка

Градоначалникот на Кочани поднесе неотповиклива оставка

17 март 2025

Почитувани сограѓани,
Во овие најтешки мигови за нашата земја и за мене лично, сакам да соопштам дека поднесувам неотповиклива оставка од функцијата градоначалник на Кочани, напиша Љупчо Папазов.
Не постојат зборови што можат да ја опишат болката што ја чувствуваме сите. Тие деца беа наши деца. Ги познавав повеќето од нив, ги познавав и нивните семејства, а со дел од нив и семејни пријатели.

Барам од сите надлежни институции да ја испитаат одговорноста на сите инволвирани! Непостапувањето е исто така одговорност. Мора да се истражат сите детали, да се најдат сите пропусти, а сите лица што придонеле кон оваа трагедија мора да одговараат. Јас се ставам целосно на располагање на институциите. Иако според закон немав директни надлежности во овој случај, подготвен сум да одговорам на сите прашања за сè, како и за моите лични постапки.

Нема зборови што можат да ја опишат мојата болка! Но, во овие моменти, мора да покажеме доблест, да манифестираме црлосна одговорност и да покажеме разлика во начинот на постапување. Со нашето однесување мора да дадеме пример дека се спротивставуваме на системот кој не функционира. Доколку постои било каков основ за одговорност кај мене, го повикувам обвинителството да го испита тоа и да постапи согласно законите.

За мене, после оваа трагедија, ништо повеќе нема исто значење! Ова беа наши деца! Многумина, со право, забележаа зошто вчера не излегов во јавност цел ден. Но, тие што ме познаваат знаат колку сум скршен и како го доживувам ова што се случи. Тешко е, и тешко ќе го преживеам.

Работев чесно и посветено целиот свој живот!

Никогаш не сум ни помислил дека вака ќе заврши и мојот ангажман, но сега се повлекувам од оваа функција, молејќи го Бога за душите на нашите деца, за нивните семејства и за народот на Македонија!, напиша Папазов на Фејсбук.

извор

ДЕА: Нападите врз бродови не го запреле шверцот на кокаин до САД

28 јули 2026

Американските напади врз бротчиња што наводно пренесувале дрога воопшто не го намалиле количеството на кокаин што доаѓа во САД, заклучила Управата за сузбивање наркотици (DEA) во внатрешен извештај.
Проценката е во спротивност со изјавите на претседателот Доналд Трамп дека операцијата Southern Spear „практично го запрела шверцот со дрога по морски пат“.
Операцијата во Карипско Море и во источниот Пацифик само ги принудила шверцерите да користат нови рути за транспорт на кокаин, заклучува DEA. Дрогата ја префрлаат на поголеми бродови и на авиони, а користат и крајбрежни рути.
Од 2 септември 2025 година па до крајот на јули, американските сили извршиле 63 напади врз бротчиња за кои оцениле дека пренесуваат дрога од Латинска Америка кон САД, при што загинале најмалку 221 лице. Пентагон тврди дека убиените луѓе биле шверцери или членови на нарко-картели, иако не ги потврдил нивните идентитети.
Организацијата за човекови права WOLA тврди дека нападите може да претставуваат вонсудски убиства, забранети според меѓународното право и како убиства согласно законите на САД.

извор

ОН собираат докази за израелски воени злосторства во Либан

28 јули 2026

Канцеларијата на Високиот комесар на ОН за човекови права документирала прекршувања на меѓународното хуманитарно право од големи размери извршени од Израел во Либан, од кои некои може да претставуваат воени злосторства. Независна мисија договорена со либанската влада, веќе е на терен и собира докази за наводни прекршувања на меѓународното право, сторени од сите страни во конфликтот по 2 март.
„Континуираните израелски воздушни напади, гранатирањето и употребата на експлозивно оружје во густо населени области предизвикале голем број цивилни жртви, широко распространето уништување и масовно раселување“, изјави комесарот Фолкер Турк, на крајот од официјалната посета на Либан. И ракетите истрелани од Хезболах кон населени области во Израел убиле цивили и оштетиле инфраструктура.
Турк изрази загриженост и поради тоа што израелските сили окупираат значителна либанска територија на југот и продолжуваат да убиваат и да повредуваат луѓе во Либан и покрај договорот за прекин на огнот постигнат на 17 април.
Цели села јужно од реката Литани – околу 30 километри од границата со Израел – се уништени или невозможни за живеење. Масовното раселување на цивили и оневозможувањето на нивното враќање, би можеле да претставуваат меѓународни злосторства.
Според либанските власти, повеќе од 4.300 луѓе се убиени, а 12.200 се повредени во Либан од 2 март, како последица на конфликтот меѓу Израел и Хезболах. Меѓу нив има повеќе од 135 здравствени работници, како и новинари и медиумски работници.

извор