Парадоксите на Дарко Мораитов ни даваат силен поттик за критичко размислување, мотивирање на нашите интелектуални инструменти на расудување. Всушност тие ни сугерираат еден вид визуелна антиномија на понудените приказни-загатки. Од таа позиција Парадоксите на Мораитов не се просторни туку временски. Затоа можат да се "дефинираат" како "мината иднина", како духовен и церебрален баланс на противречности. Иницијалниот футуризам во мотивите на Мораитов не е во функција на конечно раскинување со минатото, туку делува како допир на традицијата и побуната, како спој на помнењето и идејата. Мисла без парадокс е како љубовник без страст, фотографија без парадокс е како фригидна метреса.
Овој ликовен (намерно не – фото) проект напати "нескромно" излегува од рамките на парадоксалното, притоа кокетирајќи со оксиморони и иронија, со козерија од типот "целовита фрагментарност" или "есенцијата на стиропорот". Изобилството од симболички назнаки: бело-спознание, црвено-концентрација, млеко-бесмртност, калинка-плодност, риба-живот, јајце-зачеток/медитација... ја надградуваат клучната наративно-визуелна структура на фотографиите на Мораитов. Истражувањето на парадоксот е базичната окосница во креативниот експеримент на Мораитов, штедро зачинета со прецизност во перспективите, конзистеност во композицијата и високата селективност на енергетските точки на секое поединечно дело.
Овој проект е како патување низ зачудните димензии на човековата имагинација, како инсистирање за толковен напор во откривањето на сопствените парадокси.
Влатко Галевски
Парадокс - Дарко Мораитов
време: 15-ти септември 20:30 часот
локација: МКЦ
Повеќе за изложбата - тука
