Џони Деп потврдил дека Ал Пачино ја прифатил улогата во биографски филм за уметникот Амедео Модиљани, што ќе биде втор филм на Деп како режисер по „Храбриот“ од 1997. Насловот е „Моди“, а филмот е заснован врз драмата „Модиљани“ од Денис Мекинтаер. Сценариото е на Јержи и Мери Кромоловски.
Приказната се случува во период од 48 часа во 1916 година и следи хаотична серија настани низ улиците и кафаните на воениот Париз. Тогаш сликарот бега од полицијата, но неговата желба да ја прекине својата кариера и да го напушти градот е спречена од неговите другари и колеги - францускиот уметник Морис Утриљо, Белорусинот Шаим Сутен и англиската муза на Модиљани, Беатрис Хејстингс. Ситуацијата кулминира кога Модиљани се соочува со колекционер (Ал Пачино) кој му го менува животот.
За улогата на Модиљани е одбран Рикардо Скамарчио, додека францускиот актер Пјер Нини ќе го игра Утриљо. „Моди“ треба да почне да се снима во Будимпешта на есен.
