Нешто налик рускиот аргумент за Панама документите, на Германците им е симптоматично дека Сноуден одлучил да објави документи исклучиво за работењето на американска НСА, германското надворешно разузнавање, БНД, и британската тајна служба, а немало ништо за Русија или Кина.
"Објавувањето на документите на тајните служби е обид да се создаде раскол меѓу западна Европа и САД - најголем од крајот на Втората светска војна," објаснува во интервју за Фокус првиот човек на германското домашно разузнавање, Ханс-Георг Маасен.
Објавените документи и направија сериозен проблем на БНД, чии претставници одговараа пред парламентарна комисија за работата на НСА во Германија, и соработката на БНД со американските шпиони. За време на истрагата беше хакнат и мобилниот телефон на првиот човек на комисијата.
Во 2015-та се потврди дека БНД шпионирала компании, бизнисмени, и политички лидери во Германија и ЕУ, за сметка на американското разузнавање.
Благодарејќи на документите и истрагите по нив, Маасен објаснува дека моментално поголем дел од неговите луѓе се ангажирани на собирање документи за излагање пред парламентарните комисии, отколку што се ангажирани "околу исламскиот тероризам."
