Ракометот е најтрофејниот хрватски спорт, а нивната селекцијата редовно се враќа со медал од големите ракометни натпреварувања. Но фудбалерите и ракометарите од оваа земја кои стекнаа светска слава тешко може да се споредуваат во примањата.
Дефанзивецот на хрватската фудбалска репрезентација, Ведран Чорлука кој настапува за Локомотив Москва и Дарио Срна од Шахтјор Доњецк заработуваат по 4 милиони евра годишно, а Марио Манџукиќ од Атлетико Мадрид зема нешто повеќе од нив.
Најплатениот хрватски фудбалер во моментов е Лука Модриќ од Реал Мадрид со годишна плата од 5 милиони евра, а најдобар ракометар во светот за 2013-та година е прогласен Домагој Дувњак.
Тој е еден од најплатените ракометари во светот кој заработува во Кил околу 500.000 евра годишно или 10 пати помалку од Модриќ. Во 2009 година тој го направи и најскапиот трансфер кога од Загреб премина во Хамбург за сума од 2,5 милиони евра. Загреб од тие пари како обештетување зема милион евра, а Дувњак заработуваше по 220.000 евра годишно.
Платата на звездата на ракометната репрезентација на Хрватска може да се споредува со најплатените фудбалери во хрватското фудбалско првенство, а таму најплатен е напаѓачот на Динамо Загреб, Фернандес Жуниор кој зема годишна плата од 900.000 евра.
