Солунски фронт на ПАОК - Олимпијакос

Првиот полуфинален меч од грчкиот куп меѓу ПАОК и Олимпијакос е прекинат во 89-та минута поради судир на домашните навивачи со полицијата на теренот. Претседателот на ПАОК ја повлекол екипата и нема да патуваат на реваншот во Пиреа.

Не се очекуваше нешто друго иако до 89. минута од големото дерби натпреварот имаше нормален тек. Првиот од двата натпревари беше предвиден на стадионот Тумба во Солун, но заврши пред судијата да означи крај затоа што домашните хулигани влегоа на терен, револтирани од судиските грешки.

По отворен фудбал на двете страни, ПАОК поведе во 9. минута преку Роберт Мак кој и избега на гостинската одбрана и постигна гол за делириум на стадионот. Аргентинецот Естебан Камбијасо израмни во 27. минута со глава после корнер, а Давид Фустер во 57. минута зголеми на 1-2 за гостите.

Следеа неколку големи судиски грешки, како онаа кога гостинскиот голман Стефано Капино го сруши во шеснаесетникот Словенецот Мак, но судијата ниту досуди фаул, ниту го исклучи голманот на Олимпијакос.

На крај токму Мак поради приговор доби црвен картон и тоа беше инцијална каписла целиот стадион да се крене на нозе, домашните навивачи влегоа во теренот и настана општ хаос. Дуелот е официјално прекинат во 89. минута, а грчкиот фудбалски сојуз ќе решава за конечниот исход.

Гостинскиот тренер Марко Силва во второто полувреме беше погоден со шише во грбот:

Прекинот и влегувањето на навивачите на терен:

Претседателот на ПАОК, Русинот Иван Савидис изјави дека тој ја повлекол екипата од теренот и дека нема да патуваат на реваншот во Атина.

„ Овие 30.000 луѓе на стадионов не се плашат ниту од ѓаволот. Мора да има истрага за криминалното судење. Овие мечеви мора да ги судат странски судии, а ако федерацијата нема пари да ги плати, ПАОК ќе ги плати. За првпат во мојот живот се срамам што имам врска со грчкиот фудбал. Претседателот на сојузот мора да даде оставка, а газдата на Олимпијакос, Евангелос Маринакис мора да го напушти фудбалот.
Би сакал да им се извинам на сите што присуствуваа, за жал не гледаме дека работите одат кон подобро после она што се случи вечерва. Нема да патуваме на реваншот во Атина, каква и да е казната, мојата позиција нема да се смени. ПАОК нема да го игра реваншот па макар не исфрлиле од Супер лигата", бесно изјави Русинот Иван Савидис, првиот човек на солунскиот клуб.
На ова од Олимпијакос вратија со кратко соопштение во кое се вели: „Не се согласуваме со делириумот на господин Савидис".

Португалскиот тренер на клупата на Олимпијакос бил многу исплашен после мечот и ја напуштил прес-конференцијата после прашањето да го прокоментира судењето. Од друга страна, тренерот на ПАОК, Хрватот Игор Тудор отворено изјавил: „Грчкиот фудбал е корумпиран".

Инаку ова е втор пат во Грција сезонава да се прекинува едно дерби. Во ноември минатата година Панатинаикос и Олимпијакос не одиграа до крај затоа што навивачите на Пао се судрија со полицијата на теренот.