Актуелниот европски вицешампион беше во шок по првите половина час игра откако Јапонија направи водство од 2:0. Најпрвин од пенал погоди Хонда, а потоа водството го зголеми фудбалерот на Манчестер Јунајтед, Кагава.
Италијанците не се предадоа и со погодокот на Де Роси со глава по центар шутот на Пирло од корнер се вратија резултатски во игра на 4 минути до крајот на првиот дел.
Настаните на стартот од воторото полувреме одеа во полза на Италија која за 2 минути го направи пресвртот. Јапонците преку Учида си постигнаа автогол во 50 минута, а Марио Балотели веднаш потоа стрелаше од пенал за 3:2.
Драмата на арената „Пернамбуко“ во Речифе продолжи откако „Самураите " изведоа слободен удар, а највисок во скокот беше Оказаки кој го израмни натпреварот. Мечот го реши нововлезениот Џовинко на 4 минути до крајот.
Во третото коло Бразил и Италија се очекува да одиграат борбен меч за првата позиција со која би го избегнале светскиот и европски шампион Шпанија, која најверојатно ќе заврши на првото место во групата Б.
