За разлика од првите две средби, синоќа Атланта пружи поголем отпор, се играа и продолженија, но на крајот Леброн Џејмс беше тој што им пресуди на Јастребите 114-111.
Иако ги промаши првите 10 шута, Џејмс не падна во играта и до крајот од средбата оствари трипл-дабл. Кралот го заврши мечот со неверојатнi 37 поени, 18 скока и 13 асистенции. Претходно, Атланта го имаше последниот напад за победа, но Џеф Тиг се обиде за три поени, промаши и средбата отиде во продолжение.
Покрај Џејмс, голем удел во триумфот на Кавси имаше и Метју Белаведова со 17 поени, колку што постигна и Џеј-Ар Смит. Кај Хокси, Џеф Тиг беше водечки стрелец со 30 поени, а Пол Милсап броеше до 22. Перо Антиќ истрча само 13 секунди на паркетот, без никаков учинок.
Следниот дуел се игра во ноќта меѓу вторник и среда, кога Кливленд ќе се обиде да стави точка на серијата и со убедливи 4-0 да влезе во финалето. Другиот полуфинален пар го сочинуваат Голден Стет и Хјустон, каде Вориорс исто имаат 3-0 и се на пат до пласман во финалето.
