Легендарниот Дејвид Бекам, за кој пред два дека излезе документарец на Нетфликс, беше гостин во подкаст кај стариот добар другар Гери Невил.
Зборуваа на многу теми, а на почеток тема беше Лео Меси.
Кога пред 10 години станал дел од сопствениците на Интер Мајами, визијата му била да ги носи најдобрите играчи, иако бил свесен тоа е многу тешко, но е и голем предизвик.
„Пред четири години се прикрадов во хотелот на татко му на Меси за да се сретнам со него и тогаш не беше спремен да дојде, но јас се свртив накај татко му и му реков го сакаме твојот син кога ќе биде спремен и ако може да ги продолжиме разговорите со моите партнери. Четири години работевме на тоа. Кога беше во ПСЖ и кога постоеа шанси да се врати во Барселона, сè уште бевме во комуникација.
Да донесете играч како него, знаевме дека ќе го промени и клубот и лигата и кога е на терен и кога не е. Меси изгледаше како сон, исто како Алба и Бускетс, но со Лео сè се менува. Академијата во клубот сега има на кого да се огледа, плус тој ги учи нив, што е прекрасно“, раскажува Бекам за долгиот пат до потписот на веројатно најголемиот во светот.
Кога Меси ја донел одлуката, Бекам се наоѓал во Јапонија и не можел глава да крене од телефонски повици.
„Дознав дека доаѓа додека бев во Јапонија. Ни се јави татко му и ни кажа дека Лео ќе пушти соопштение. Беше 5 часот наутро, Викторија и децата спиеа, телефонот збудале, имав еден куп повици и пораки. Тој сакаше со семејството да живее таму и сакаше да игра фудбал и да победува на начинот на кој што игра. Бев многу возбуден бидејќи ни беше потребно долго време и беше многу тешко да се донесе.
Ние му дадовме понуда, но тој имаше понуди и од Саудиска Арабија и од Барселона, за што бев загрижен со оглед на неговата поврзаност таму. Но потоа требаше сам да одлучи“.
Како е кога го гледаш од близу?
„Против Меси играв кога бев во Реал Мадрид и ПСЖ и се разбира тогаш беше неверојатен, но друго е кога го гледаш вака и му го пратиш секој потег и секое движење. Тој е неверојатен за младите, голем е. Кога дојде во Мајами и кога почна да тренира, секое сабајле бев на тренинг во 7 часот сабајле само за да го гледам. Да видам како тренира, како се спрема. Тој е толку многу паметен, неговиот мозор работи поинаку. Кај него гледаш работи што кај другите играчи не ги гледаш. Лани освои Светско, а уште е гладен за успеси како да е млад“.
Како е Меси приватно кога излегувате заедно?
„Многу е мирен и нормален. Во Мајами сите го следат, на секој тренинг доаѓаат илјадници луѓе за него. Го чекаат и кога заминува со кола. Но откако дојде тука вози сам, оди во супермаркет, на шопинг и луѓето се шокирани од тоа. Но тој е таков, мирен е, голем работник, има прекрасно семејство. Тој е нормално момче со неверојатен талент“.
Бекам во подкастот зборува и на многу други теми, како новиот документарец, кризите после Светското 98-ма, времето во Манчестер Јунајтед, односите со Фергусон. Фино друштво се собрани.
