Снимката е од пред 40 години од мечот Челси - Манчестер Сити во Милк Купот, денес познат како Карабао Куп или наједноставно Лига Куп. Изведувачот е Пет Невин, а коментаторот е запрепастен и со право ќе го прогласи пеналот за најлош.

Валенсија ја доби Осасуна на гости со 0:1, а хрватскиот напаѓач Анте Будимир после ова веројатно за последен пат ќе добие можност да шутира пенал за својот тим. Погледнете го што успеа да изведе и тоа во судиското продолжение.

И со пеналите се претера. Едни се обидуваат со краток залет, други трчкаат како манекени пред да го изведат, трети му ја подаваат на голманот како на тренинг. Поради аматерскиот удар на 21 годишниот напаѓач на Расинг Сантандер, Жерар Фернандез Кастелано познато Пеке, неговите загубија дома 0:1 од Алкоркон и тоа со три црвени картони им ги собраа бодовите.

Да водиш 5:0 и да пробуваш нешто ајде, ама ова глупирање се случи во пенал серија за тоа кој оди понатаму во Куп на Франција. Пациентот се вика Елиот Симое и треба да биде среќен што неговиот Нанси успеа да го мине Рен на пенали. Инаку ова е за ластици и греење клупа.

Прво зема залет од дома, па подзастанува, па подскокнува како кенгур и на крај ја шутира во него. Бадијала целото пренамагање и изводење.

И непрецизниот пенал знае да биде многу прецизен. Она што е најважно во случајов е што нема жртви.

Второлигашниот натпревар меѓу Слога Виница и Тиквеш ги измести границите за судење пенал. Погледнете го ова театрално паѓање на еден од домашните фудбалери кој од што не знаеше што да направи се струполи доле со епско симулирање прекршок.

Ја имаат зарогано на трибина ликови како Стам, Бекам и Рамос, ама никој не успеал до сега да ја отера до небо. Велат дека кружи околу сонцето.

Судиите на синоќешниот дерби меч од Ла Лига тотално го изгубија компасот. Досудија три пенали од кои еден постоечки, друг сомнителен, трет тешки срамотилаци. Каква ли технологија треба да излезе за да се престане веќе со овој аматеризам.

На Куп натпревар во Бразил меѓу екипите на Пајсанду и Куијаба, финалето после нерешениот исход се решавало на пенали. Куијаба загуби затоа што довербата на крај му ја даде на човек кој после ова корнер не треба да му дадат да изведе.

Пет дена поминаа откако анонимус од Гвадалахара, Мексико изведуваше бесни глисти од 11 метри и ете ти сега ново такво глупирање кое очигледно не вродува со плод. Напротив, срамно е ова.

Фиорентина против Гвадалахара од Мексико на пријателска. Нормално дека Италијанците ќе победат 2:1, кога имаш ваков пеналџија за кој едниот од коментаторите рече: Најлошиот пенал што сум го видел до сега.

Сè што може да НЕ очекувате се случи во овој удар од 11 метри. 1.Сопка 2.Асистенција 3.Гол на друг играч. 4.ВАР 5.Поништен гол. Ваков хаотичен пенал не се видело до сега, а му успеа на Макаби Тел Авив.

Го знаете ли вие Бонџи Нтули од јужноафриканскиот клуб Амазулу? Баталете го и неговото, а и името на клубот бидејќи секако нема да ги запамтите. Поентава е да видите што сè успеа типов да направи за 5 секунди во шеснаесетник, а да “не го видат“.

Во англиската Лига 1 (трета лига), синоќа играа Портсмут и Бристол Роверс. При резултат 1-1, шпицот на гостите Џонсон Кларк-Херис ја опна топката над облакодерите во близина на стадионот. Интересно голот за Бристол претходно го даде токму Кларк-Херис од пенал ама пропушти да им донесе победа.

Џиангсу и Тијанџин одиграа куп натпревар во Кина на кој срамот го изеде довчерашниот дефанзивец на Милан, Палета кој според информациите од кинеските медиуми утепал три чавки и еден гавран.

Доста беа кавги и анализи за пеналот на дуелот меѓу Реал и Јуве. Во 1960-та година во финале се сретнаа Реал и Ајнтрахт Франкфурт конечни 7:3. Четири гола даде Ди Стефано и уште три Пушкаш. За пеналот како да ви кажеме...Работава не примам цивки.

На 2. јули минатата година Италија загуби од Германија во 1/4 финалето на Европското, а мечот го одбележаа пеналите на Заза и Пеле кои станаа предмет на иронија на интернет. После нив имаше и други трапаво изведени удари од белата точка.

Во египетското првенство судија свирна пенал за кој ни тој самиот не знае зошто го свирна. Се чудеа дури и играчите кои добија удар од белата точка.

Се играше меч од Купот на Литванија меѓу второлигашите Силуте и Силас кој заврши 0:0. Следуваа пенали, а таму се прослави гостинскиот фудбалер Гитис Сиугзда.